ଗୋଟିଏ ବିଭାଗର ତିନି ମନ୍ତ୍ରୀ!

ଭୁବନେଶ୍ବର: ରାଜ୍ୟ ସରକାରଙ୍କର ଗୋଟିଏ ବିଭାଗରେ ଅଛନ୍ତି ତିନି ତିନି ମନ୍ତ୍ରୀ। ଏକଥା ପଢ଼ି ଆପଣଙ୍କୁ ଆଶ୍ଚର୍ଯ୍ୟ ଲାଗୁଛି କି। ଆଶ୍ଚର୍ଯ୍ୟ ଲାଗିଲେ ବି କଥାଟି ସତ। ଜଣେ ନିର୍ବାଚନ ହାରି ସୁଦ୍ଧା ମନ୍ତ୍ରୀପଦରେ ଅଛନ୍ତି ତ ଆଉ ଜଣେ ବାଚସ୍ପତି ଥାଇ ମଧ୍ୟ ମନ୍ତ୍ରୀପଦରେ ଅଛନ୍ତି। ଅପରପକ୍ଷେ ଜଣେ ୨୦୧୯ ସାଧାରଣ ନିର୍ବାଚନରେ ବିଜୟୀ ହୋଇ ନୂତନ କରି ମନ୍ତ୍ରୀପଦ ପାଇଛନ୍ତି। ଏକଥା ଆମେ କହୁନାହୁଁ ଓଡ଼ିଶା ସରକାରଙ୍କ ତିନି ତିନିଟି ଓ୍ବେବସାଇଟରେ ଏଭଳି ତଥ୍ୟ ଉଲ୍ଲେଖ ରହିଛି। ରାଜ୍ୟ ସରକାରଙ୍କ ଦ୍ବାରା ପରିଚାଳିତ ଓ୍ବେବସାଇଟ କହୁଛି ଓଡ଼ିଶାରେ ତିନି ଜଣ ସମବାୟ ମନ୍ତ୍ରୀ।

Damodar Rout

ରାଜ୍ୟ ସରକାରଙ୍କର ସମବାୟ ବିଭାଗରେ ଅଛନ୍ତି ତିନି ତିନି ମନ୍ତ୍ରୀ। ଦାମୋଦର ରାଉତ ବିଜେଡ଼ି ଦଳ ଛାଡ଼ିଛନ୍ତି, ବିଜେଡ଼ି ବିରୁଦ୍ଧରେ କହୁଛନ୍ତି ଏବଂ ବର୍ତ୍ତମାନ ବିଜେପିର ବରିଷ୍ଠ ନେତାମଧ୍ୟ ସିଏ। ତଥାପି ସେ ଏବେ ରାଜ୍ୟ ସରକାରଙ୍କର ସମବାୟ ମନ୍ତ୍ରୀ ଭାବେ ଅଛନ୍ତି। ଏହି ତଥ୍ୟ www.housingcooperativeodisha.nic.in ରେ ଉଲ୍ଲେଖ ଅଛି। ନବୀନଙ୍କ ତୃତୀୟ ପାଳିରେ ଦାମ ଥିଲେ ସମବାୟ ମନ୍ତ୍ରୀ।

Surya Patra

ବାଚସ୍ପତି ରାଜ୍ୟ ସରକାରଙ୍କ କିମ୍ବା କୌଣସି ଦଳର ଅଂଶ ନୁହନ୍ତି। ତେବେ ବର୍ତ୍ତମାନର ବାଚସ୍ପତି ସୂର୍ଯ୍ୟ ନାରାୟଣ ପାତ୍ର ରାଜ୍ୟ ସରକାରଙ୍କର ସମବାୟ ମନ୍ତ୍ରୀ ଭାବେ ବର୍ତ୍ତମାନ ଅଛନ୍ତି ବୋଲି www.housingcorporation.in ଓ୍ବେବସାଇଟରେ ଉଲ୍ଲେଖ ରହିଛି। ନବୀନଙ୍କ ଚତୁର୍ଥ ପାଳିରେ ସମବାୟ ମନ୍ତ୍ରୀ ଭାବେ ଦାୟିତ୍ବ ତୁଲାଇଥିଲେ ଏବର ବାଚସ୍ପତି ସୂର୍ଯ୍ୟ ନାରାୟଣ ପାତ୍ର।

Ranendra Pratap Swain

୨୦୧୯ ସାଧାରଣ ନିର୍ବାଚନରେ ବିଜୟୀ ଲାଭ କରି ଆଠଗଡ଼ ବିଧାୟକ ରଣେନ୍ଦ୍ର ପ୍ରତାପ ସ୍ବାଇଁ ନବୀନଙ୍କ ପଞ୍ଚମ ପାଳିରେ ସମବାୟ ମନ୍ତ୍ରୀ ଭାବେ ଦାୟିତ୍ବରେ ଅଛନ୍ତି। ତାହା coopodisha.in ଓ୍ବେବସାଇଟରେ ଉଲ୍ଲେଖ ରହିଛି।

୫-ଟିକୁ ଗୁରୁତ୍ବ ଦେଉଥିବା ଓଡ଼ିଶା ସରକାର ଟେକ୍ନୋଲୋଜିରେ କେତେ ପଛରେ ଅଛନ୍ତି ଏଥିରୁ ସ୍ପଷ୍ଟ ଜଣାପଡ଼ୁଛି। ରାଜ୍ୟ ସରକାରଙ୍କ ତରଫରୁ ବହୁ ସଂଖ୍ୟକ ଓ୍ବେବସାଇଟ ଖୋଲାଯାଉଛି ସତ କିନ୍ତୁ ତାହାକୁ ସଠିକ୍‌ ଭାବେ କାର୍ଯ୍ୟକାରୀ କରୁନାହାନ୍ତି ରାଜ୍ୟ ସରକାର। ଓ୍ବେବସାଇଟ ପାଇଁ ରାଜ୍ୟ ସରକାର ବହୁ ଟଙ୍କା ଖର୍ଚ୍ଚ କରୁଛନ୍ତି। ହେଲେ ତାହା ସୁଚାରୂରୂପେ କାର୍ଯ୍ୟକାରୀ ହେଉ ନ ଥିବାରୁ ଲୋକଙ୍କୁ ଏଭଳି ବିଭ୍ରାନ୍ତିକର ତଥ୍ୟ ମିଳୁଛି।