ବେଙ୍ଗାଲୁରୁ: ଚନ୍ଦ୍ରଯାନ-୨ ମହାକାଶରେ ଇତିହାସ ରଚିବା ପୂର୍ବରୁ ଲ୍ୟାଣ୍ଡର ବିକ୍ରମ ଚନ୍ଦ୍ର ନିକଟରେ ପହଞ୍ଚିବା ପାଇଁ ମାତ୍ର ୨.୧ କିଲୋମିଟର ଥିବା ବେଳେ ଯୋଗାଯୋଗ ବିଚ୍ଛିନ୍ନ ହୋଇଥିଲା। ଇତିହାସ ରଚିବା ଲାଗି ନିକଟତର ହେଉଥିବା ଭାରତ ଶେଷ ପର୍ୟ୍ୟାୟରେ ନିରାଶ ହୋଇଛି। ଏଥିସହିତ ଇସ୍ରୋ ବୈଜ୍ଞାନିକମାନଙ୍କ ମନୋବଳ ଭାଙ୍ଗିଯାଇଛି। ହେଲେ ସମସ୍ତଙ୍କ ପାଇଁ ଖୁସି ଖବର। ଏହି ଅଭିଯାନ ବିଫଳ ହୋଇନାହିଁ। କାରଣ ଏବେ ବି ଅର୍ବିଟର ଚନ୍ଦ୍ରର କକ୍ଷପଥରେ ପରିକ୍ରମା କରୁଛି। ଗତ ୨ ତାରିଖରେ ଲ୍ୟାଣ୍ଡର ବିକ୍ରମ ଅର୍ବିଟରଠାରୁ ଅଲଗା ହୋଇଥିଲା।
ଇସ୍ରୋ ଅଧ୍ୟକ୍ଷ କେ. ଶିବନ କହିଛନ୍ତି, ଲ୍ୟାଣ୍ଡର ବିକ୍ରମ ସହିତ ସମ୍ପର୍କ ଛିନ୍ନ ହୋଇଛି। ୯୭୮ କୋଟି ଟଙ୍କା ଖର୍ଚ୍ଚ ହୋଇଥିବା ଏହି ଅଭିଯାନର ସବୁକିଛି ଶେଷ ହୋଇନାହିଁ। ଜଣେ ଅଧିକାରୀ କହିଛନ୍ତି, ମିଶନର କେବଳ ୫%(ଲ୍ୟାଣ୍ଡର ବିକ୍ରମ ଏବଂ ରୋଭର ପ୍ରଜ୍ଞାନ) ନଷ୍ଟ ହୋଇଛି। ୯୫ ପ୍ରତିଶତ ଅର୍ବିଟର ସଫଳତାର ସହିତ ଚନ୍ଦ୍ର କକ୍ଷପଥରେ ପରିକ୍ରମା କରୁଛି। ଅର୍ବିଟରର ଅବଧି ଏକ ବର୍ଷ। ଅର୍ଥାତ ସେ ଇସ୍ରୋକୁ ଲଗାତାର ଫଟୋ ପଠାଇ ଚାଲିବ।
ଆଉଜଣେ ଅଧିକାରୀ କହିଛନ୍ତି, ଅର୍ବିଟର ଲ୍ୟାଣ୍ଡର ବିକ୍ରମର ଫଟୋ ବି ପଠାଇପାରେ। ସେଥିରୁ ଲ୍ୟାଣ୍ଡରର ସ୍ଥିତି ବିଷୟରେ ଜଣାପଡ଼ି ପାରିବ। ଚନ୍ଦ୍ରଯାନ-୨ର ୩ଟି ଭାଗ ରହିଛି। ଅର୍ବିଟର(୨୩୭୯ କିଗ୍ରା), ବିକ୍ରମ(୧୪୭୧ କିଗ୍ରା) ଏବଂ ରୋଭର(୨୭ କିଗ୍ରା)।
Comments are closed.