Sun. Sep 15th, 2019

Odisha Link

bridging the missing links in odisha

ଏଥର ପୂଜାରେ ବାଜିବନାହିଁ ଡିଜେ ଆଉ ଅଶ୍ଳୀଳ ଗୀତ: ପୋଲିସ କମିଶନର

  •  
  •  
  •  
  •  
  •  
  •  
  •  

ଭୁବନେଶ୍ୱର: ଦୁର୍ଗାପୂଜାରେ ଏଥର ବାଜିବନି ଛାତି ଥରାଇଦେଉଥିବା ଡିଜେ ସାଉଣ୍ଡ୍‌। ଡିଜେରେ ପ୍ରତିଯୋଗିତା ବି ଚାଲିବ ନାହିଁ। କେବଳ ୪ଟି ଲେଖାଏ ମାଇକ୍‌ ଓ ବକ୍ସ ଲଗାଇବାକୁ ପୂଜା କମିଟିଗୁଡିକୁ ନିର୍ଦ୍ଦେଶ ଦେଇଛନ୍ତି ପୋଲିସ କମିଶନର ସୁଧାଂଶୁ ଷଡ଼ଙ୍ଗୀ। କମିଶନରେଟ ପୋଲିସ ମୁଖ୍ୟାଳୟରେ ପୂଜା କମିଟିଗୁଡିକୁ ନେଇ ଦୁର୍ଗାପୂଜା ପ୍ରସ୍ତୁତି ବୈଠକ ଅନୁଷ୍ଠିତ ହୋଇଥିଲା। ପୂଜାକୁ ଶୃଙ୍ଖଳିତ ତଥା ସୁନ୍ଦର ଭାବେ ଶେଷ କରିବା ଉପରେ କମିଶନରର ଷଡ଼ଙ୍ଗୀ ଗୁରୁତ୍ୱ ଦେବା ସହ ଏନେଇ କମିଟି କର୍ମକର୍ତ୍ତାଙ୍କ ସହ ଆଲୋଚନା କରିଥିଲେ। କମିଶନର କହିଲେ, ସ୍ଥାନୀୟ ଥାନାଧିକାରୀ ପୂଜା କମିଟି ସହ ଆଲୋଚନା କରି ଛୋଟ ସମସ୍ୟାଗୁଡିକର ସମାଧାନ କରିବେ।
ଏଥର ନୂଆ କରି ବିଭିନ୍ନ ପୂଜାମଣ୍ଡପର ସ୍ବେଚ୍ଛାସେବୀଙ୍କୁ ନେଇ ଏକ ଏସ୍‌ପିଓ ଗଠନ କରାଯିବ। କମିଶନରେଟ ପୋଲିସ ସେମାନଙ୍କୁ ସ୍ବତନ୍ତ୍ର ପ୍ରଶିକ୍ଷଣ ଦେବା ପରେ ବିଭିନ୍ନ ପୂଜା ମଣ୍ଡପରେ ସୁରକ୍ଷା ଦାୟିତ୍ୱରେ ରହିବେ। ପୂଜା ମଣ୍ଡପର ସଦସ୍ୟଥିବା ଟାଣୁଆ ଯୁବକଙ୍କୁ ବାଛି ନାମ ଠିକଣା ଆଦି ଦେବାକୁ କମିଶନର ନିର୍ଦ୍ଦେଶ ଦେଇଛନ୍ତି। ସେହିପରି ପୂଜା କମିଟି ସଦସ୍ୟଙ୍କ ନାମରେ ଚାନ୍ଦା ମାଗିବା ଭଳି ସଙ୍ଗିନ ଅଭିଯୋଗ ଆସିଲେ ତାଙ୍କ ବିରୋଧରେ ତୁରନ୍ତ କାର୍ଯ୍ୟାନୁଷ୍ଠାନ ନିଆଯିବ। ଶ୍ରଦ୍ଧାଳୁମାନେ ମା’ଙ୍କ ଦର୍ଶନ ସମୟରେ ଚୋରି ଓ ଲୁଟ୍‌ର ଶିକାର ହୋଇଥାନ୍ତି। ଏଥିପାଇଁ ବଡ଼ ବଡ଼ ପୂଜାମଣ୍ଡପରେ ସିସିଟିଭି ଲଗାଇବାକୁ ବାଧ୍ୟତାମୂଳକ କରାଯାଇଛି। ରାବଣପୋଡି ପାଇଁ ସୁରକ୍ଷା ବ୍ୟବସ୍ଥାକୁ କଡାକଡି କରାଯିବା ସହ ଜନଗହଳି ସ୍ଥାନରୁ ଦୂରରେ କରିବା ପାଇଁ କମିଶନର ଷଡ଼ଙ୍ଗୀ କହିଛନ୍ତି। ସିଙ୍ଗଲଓ୍ବିଣ୍ଡୋ ମାଧ୍ୟମରେ ବିଭିନ୍ନ ସମସ୍ୟାର ସମାଧାନ ଓ ଲାଇସେନ୍ସ ପ୍ରଦାନ କରାଯିବ ବୋଲି ଏହି ବୈଠକରେ ନିଷ୍ପତ୍ତି ହୋଇଛି।
ପୋଲିସ କମିଶନର ସୁଧାଂଶୁ ଷଡ଼ଙ୍ଗୀ, ମନ୍ତ୍ରୀ ଅଶୋକ ଚନ୍ଦ୍ର ପଣ୍ଡା, ଉତ୍ତର ବିଧାୟକ ସୁଶାନ୍ତ ରାଉତ, ମଧ୍ୟ ବିଧାୟକ ଅନନ୍ତ ନାରାୟଣ ଜେନା, ଜଟଣୀ ବିଧାୟକ ସୁରେଶ ଚନ୍ଦ୍ର ରାଉତରାୟ, ଅତିରିକ୍ତ ପୋଲିସ କମିଶନର ସଞ୍ଜୟ ସିଂ, ଡିସିପି ଅନୁପ କୁମାର ସାହୁ, ଟ୍ରାଫିକ ଡିସିପି ସାଗରିକା ନାଥ, ବିଏମ୍‌ସି ଓ ଅନ୍ୟ ବିଭାଗର ଅଧିକାରୀମାନେ ଉପସ୍ଥିତ ଥିଲେ।
ଚଳିତବର୍ଷ ରାଜଧାନରେ ୧୭୨ଟି ପୂଜା ମଣ୍ଡପ ହେବ। ଏଥିତ୍ମଧ୍ୟରୁ ‘ଏ’ ଏବଂ ‘ସି’ କାଟାଗୋରୀରେ ୫୫ ଓ ‘ବି’ରେ ୬୨ଟି ମେଢ଼ ହେବ। ବୈଠକରେ ଏକାଧିକ ପୂଜା କମିଟି ସେମାନଙ୍କ ବିଭିନ୍ନ ସମସ୍ୟା ସମ୍ପର୍କରେ ଜଣାଇଥିଲେ। ମୀନା ବଜାର ଓ ମଣ୍ଡପରେ ଲଗାଯାଉଥିବା ବିଜ୍ଞାପନ ବ୍ୟାନର ଉପରେ ବିଏମ୍‌ସିର ଟିକସ ବ୍ୟବସ୍ଥାକୁ ସେମାନେ ବିରୋଧ କରିଥିଲେ। ପୂଜା କମିଟି ଚାନ୍ଦା ମାଗିବେ ନାହିଁ, ବ୍ୟାନର ଲଗାଇଲେ ଟ୍ୟାକ୍ସ ଦେବେ, ପୂଜା ହେବ କେମିତି ବୋଲି ପୂଜା କମିଟି କର୍ମକର୍ତ୍ତା ପ୍ରଶ୍ନ କରିଥିଲେ। ସେହିଭଳି ପୂଜା ମଣ୍ଡପ ନିକଟରେ ରହିଥିବା ଖାଲଖମାକୁ ବନ୍ଦ କରାଯାଉନି। ଷ୍ଟ୍ରିଟ୍‌ଲାଇଟ୍‌ ଓ ବିଦ୍ୟୁତ୍‌ ସମସ୍ୟା ଚିନ୍ତା ବଢ଼ାଇଛି। ଜନପଥର ଦୁଇପାର୍ଶ୍ୱରେ ବଡ଼ ବଡ଼ ଗାତ ଖୋଳାଯାଇ ଡ୍ରେନ୍‌ ଓ ଭୂତଳ କେବୁଲ କାମ କରାଯାଉଛି। ଯୁଦ୍ଧକାଳୀନ ଭିତ୍ତିରେ ଖାଲକୁ ପୂରଣ କରିବାକୁ ଉପସ୍ଥିତ ବିଏମ୍‌ସି ଅଧିକାରୀଙ୍କୁ ସେମାନେ ଦାବି କରିଥିଲେ।