ଭୁବନେଶ୍ୱର : ଓଡ଼ିଶା ଉପକୂଳରେ ପୁରୀ ବ୍ୟତିତ ଆଉ ୫ଟି ସମୁଦ୍ରକୂଳକୁ ବ୍ଲୁ ଫ୍ଲାଗ୍ ମାନ୍ୟତା ତଥା ଗ୍ଲାମ୍ପିଂ ଯୋଜନା ଦ୍ୱାରା ଓଡ଼ିଶାର ପର୍ଯ୍ୟଟନ ଶିଳ୍ପର ମାନ ବୃଦ୍ଧି ପାଇବ ବୋଲି ରାଜ୍ୟ ସରକାରଙ୍କର ଜଣେ ବରିଷ୍ଠ ଅଧିକାରୀ ସୂଚନା ଦେଇଛନ୍ତି।
ଓଡ଼ିଶା ପର୍ଯ୍ୟଟନ ନୀତି ୨୦୧୬ରେ ଏହି ସବୁ ପଦକ୍ଷେପ ଗ୍ରହଣ କରାଯିବା ନିମନ୍ତେ ଯୋଜନା କରାଯାଇଥିବା ବେଳେ ଏହା ଦ୍ୱାରା ପର୍ଯ୍ୟଟନ କ୍ଷେତ୍ରକୁ ଅଧିକ ପ୍ରୋତ୍ସାହନ ଦିଆଯାଇପାରିବ ବୋଲି ରାଜ୍ୟ ପର୍ଯ୍ୟଟନ ବିଭାଗ ନିର୍ଦ୍ଦେଶକ ସଚିନ୍ ରାମଚନ୍ଦ୍ର ଯାଦବ ସୂଚନା ଦେଇଛନ୍ତି।
ମଙ୍ଗଳବାର ଶିକ୍ଷା ଓ ଅନୁସନ୍ଧାନ ପରିଚାଳିତ ସ୍କୁଲ୍ ଅଫ୍ ହୋଟେଲ ମ୍ୟାନେଜମେଂଟରେ ଯୋଗ ଦେଇଥିବା ନୂତନ ଛାତ୍ରଛାତ୍ରୀମାନଙ୍କ ଉଦ୍ଦେଶ୍ୟରେ ଆୟୋଜିତ ଭର୍ଚୁଆଲ୍ ଓରିଏନଟେସନ୍ କାର୍ଯ୍ୟକ୍ର୍ରମରେ ଯୋଗ ଦେଇ ଏହି ସୂଚନା ଦେଇଛନ୍ତି ଯାଦବ।
ଗ୍ଲାମରସ ଓ କ୍ୟାମ୍ପିଂ ଭଳି ଦୁଇଟି ଶବ୍ଦକୁ ନେଇ ଗ୍ଲାମ୍ପିଂ ଭଳି ଶବ୍ଦର ବ୍ୟବହାର ଆରମ୍ଭ କରାଯାଇଛି। ଏହାର ଉଦ୍ଦେଶ୍ୟ ହେଉଛି ବିଭିନ୍ନ ସମୁଦ୍ରକୂଳ ଅଂଚଳକୁ ବୁଲିବାକୁ ଆସୁଥିବା ପର୍ଯ୍ୟଟକ ମାନଙ୍କୁ ରହିବା ନିମନ୍ତେ ଅତ୍ୟାଧୁନିକ ସୁବିଧା ସୁଯୋଗ ଯୋଗାଇଦେବା । ଯାହାକି ସାଧାରଣ କ୍ୟାମ୍ପିଂରେ ମିଳିନଥାଏ ।
ଯାଦବ କହିଛନ୍ତି ଯେ, ପର୍ଯ୍ୟଟନ କ୍ଷେତ୍ରରେ ଓଡ଼ିଶାରେ ଅନେକ ଭବିଷ୍ୟତ ରହିଛି । ବର୍ତମାନ ମିଟିଂ, ସମ୍ମିଳନୀ, ପ୍ରଦର୍ଶନୀ ଯାହାକୁ କି ମାଇସ୍ ବୋଲି କୁହାଯାଉଛି ତାହାକୁ ନେଇ ଆମ ରାଜ୍ୟରେ ଅନେକ ସମ୍ଭାବନା ରହିଛି ।
ଏହି ଅନଲାଇନ କାର୍ଯ୍ୟକ୍ରମରେ ସୋଆ କୂଳପତି ପ୍ରଫେସର ଅଶୋକ କୁମାର ମହାପାତ୍ର ଅଧ୍ୟକ୍ଷତା କରିଥିବାବେଳେ ଆତିଥ୍ୟ ଉପଦେଷ୍ଟା, କନସଲ୍ଟାଂଟ ଓ ଟ୍ରେନର୍ ଅପରେସ ସିହ୍ନା, ଏସଏଚଏମର ଡିନ ତଥା ଉପଦେଷ୍ଟା ପ୍ରଫେସର ଶିତିକଣ୍ଠ ମିଶ୍ର ପ୍ରମୁଖ ନିଜର ବକ୍ତବ୍ୟ ରଖିଥିଲେ।
ସିହ୍ନା ନୂତନ ଭାବେ ଯୋଗଦେଇଥିବା ଛାତ୍ରଛାତ୍ରୀମାନଙ୍କୁ ଏଭଳି ଏକ ଆକର୍ଷକ କ୍ୟାରିୟର ବାଛିଥିବାରୁ ଶୁଭେଚ୍ଛା ଜଣାଇବା ସହ ଏହା ଦ୍ୱାରା ପ୍ରତ୍ୟେକ ଦିନ ସେମାନେ ନୂଆ ନୂଆ ଲୋକଙ୍କୁ ଭେଟି ଆଲୋଚନା କରିବାର ସୁଯୋଗ ପାଇପାରିବେ ବୋଲି କହିଥିଲେ। ସେମାନେ ଅଚିହ୍ନା ବ୍ୟକ୍ତି ମାନଙ୍କ ସହ ମଧ୍ୟ କିଭଳି କଥାବାର୍ତା କରାଯାଇପାରିବ ତାହା ଏହି ପାଠ୍ୟକ୍ରମ ଦ୍ୱାରା ଜାଣିପାରିବେ ବୋଲି କହିଥିଲେ।
ପର୍ଯ୍ୟଟନ ଶିଳ୍ପ ପ୍ରତି ୨.୫ ସେକେଣ୍ଡରେ ନୂତନ ଚାକିରୀର ସୁଯୋଗ ଯୋଗାଇଥାଏ ଏବଂ ଛାତ୍ରଛାତ୍ରୀମାନେ ଧର୍ଯ୍ୟ ବୃଦ୍ଧି କରିବା ସହ ନିଜ ଦକ୍ଷତାକୁ ବିନିଯୋଗ
କରି ଏହି ସୁଯୋଗକୁ ହାତକୁ ନେବାର ଆବଶ୍ୟକତା ରହିଛି।
ହୋଟେଲ, ହସପିଟାଲ ଏବଂ ରେଷ୍ଟୁରାଂଟ ତଥର ବିମାନ ଚଳାଚଳ ଶିଳ୍ପରେ ଏହି ଛାତ୍ରଛାତ୍ରୀମାନଙ୍କ ନିମନ୍ତେ ଅନେକ ସୁଯୋଗ ରହିଛି। ସେହିପରି କୋଭିଡ- ୧୯ ମହାମାରୀ ଖାଦ୍ୟ ସୁରକ୍ଷା ବିଶେଷଜ୍ଞମାନଙ୍କ ପାଇଁ ମଧ୍ୟ ନୂତନ ସୁଯୋଗ ସୃଷ୍ଟି କରିଛି ବୋଲି ସିହ୍ନା କହିଛନ୍ତି।
ପ୍ରଫେସର ମହାପାତ୍ର କହିଛନ୍ତି ଯେ, ମାତ୍ର ୧୩ ବର୍ଷ ମଧ୍ୟରେ ସୋଆ ପୂର୍ବାଞ୍ଚଳରେ ଏକ ଉତମ ବିଶ୍ୱବିଦ୍ୟାଳୟ ଭାବେ ପ୍ରତିପାଦିତ ହୋଇପାରିବା ସହ ନ୍ୟାସନାଲ ଇନଷ୍ଟିଚ୍ୟୁସନାଲ ର୍ୟାଂଙ୍କି ଫ୍ରେମୱାର୍କ ର୍ୟାଙ୍କିଂରେ ଦେଶରେ ଶ୍ରେଷ୍ଠ ୨୦ ତମ ବିଶ୍ୱବିଦ୍ୟାଳୟଭାବେ ମାନ୍ୟତା ପାଇଛି।
ପ୍ରଫେସର ମିଶ୍ର ଏହି ଇନଡକ୍ସନ କାର୍ଯ୍ୟକ୍ରମ ସମ୍ପର୍କରେ ବିସ୍ତୃତ ସୁଚନା ଦେବା ସହ ଏହା ଡିସେମ୍ବର ୧୧ ତାରିଖ ଯାଏ ଚାଲିବ ବୋଲି କହିଛନ୍ତି । ଅନ୍ୟମାନଙ୍କ ମଧ୍ୟରେ ସୋଆ ରେଜିଷ୍ଟର ପ୍ରଫେସର ବି.ବି.ପ୍ରଧାନ, ହ୍ୟୁମାନିଟି ବିଭାଗର ପ୍ରଫେସର ଅଶୋକ ମହାନ୍ତି ଏହି କାର୍ଯ୍ୟକ୍ରମରେ ଯୋଗଦେଇଥିବାବେଳେ ବିଏଚଏମସିଟିର ଶେଷ ବର୍ଷର ଛାତ୍ରୀ ଶ୍ୱେତା ବୋଇତି କାର୍ଯ୍ୟକ୍ରମ ସଂଚାଳନ କରିଥିଲେ । ଏସଏଚଏମର ଆସୋସିଏଟ ପ୍ରଫେସର ଡ. ସ୍ମିତା ସୁଚରିତା ମହାପାତ୍ର ଧନ୍ୟବାଦ ଅର୍ପଣ କରିଥିଲେ ।
Comments are closed.