ପେଗାସସ ମାମଲା: ତିନି ସାମ୍ବାଦିକଙ୍କ ଫୋନରୁ ସ୍ପାଇଓ୍ୱେୟାର ଠାବ
ନୂଆଦିଲ୍ଲୀ: ପେଗାସସ ପ୍ରସଙ୍ଗକୁ ନେଇ ସାରା ଦେଶରେ ତମ୍ବି ତୋଫାନ ଚାଲିତିବା ବେଳେ ଚାଞ୍ଚଲ୍ୟକର ତଥ୍ୟ ରଖିଛି ଫ୍ରାନ୍ସର ଗୁଇନ୍ଦା ସଂସ୍ଥା। ଫ୍ରାନ୍ସର ତିନି ଜଣ ସାମ୍ବାଦିକଙ୍କ ଫୋନରେ ସ୍ପାଇଓ୍ୱେୟାର ଠାବ ହୋଇଛି ବୋଲି କହିଛି ଫ୍ରାନ୍ସର ଗୁଇନ୍ଦା ସଂସ୍ଥା। ପେଗାସସ ଜରିଆରେ ଫ୍ରାନ୍ସ ରାଷ୍ଟ୍ରପତି ଇମାନୁଏଲ ମାକ୍ରନ, ଇରାକ ରାଷ୍ଟ୍ରପତି ବାରହମ ସାଲି ଓ ଦକ୍ଷିଣ ଆଫ୍ରିକାର ରାଷ୍ଟ୍ରପତି ସାଇରିଲ ରାମୋଫାସାଙ୍କୁ ଟାର୍ଗେଟ କରାଯାଇଥିଲା।
ଏହା ସହ ଦେଶ ବିଦେଶର ଅନେକ ରାଜନେତା, ମନ୍ତ୍ରୀ, ବିଚାରପତି, ସାମ୍ବାଦିକଙ୍କୁ ଟାର୍ଗେଟ କରାଯାଇଥିବା ଖବର ପ୍ରକାଶ ପାଇବା ପରେ ଚାଞ୍ଚଲ୍ୟ ସୃଷ୍ଟି ହୋଇଥିଲା। ପ୍ରଥମ ଥର ଲାଗି ଫ୍ରାନ୍ସ ଗୁଇନ୍ଦା ସଂସ୍ଥା ପକ୍ଷରୁ କୁହାଯାଇଛି ଯେ, ୩ ଜଣ ସାମ୍ବାଦିକଙ୍କ ଫୋନରୁ ଏହି ସ୍ପାଇଓ୍ୱେୟାର ଠାବ ହୋଇଛି।
ଫ୍ରାନ୍ସର ନ୍ୟାସନାଲ ଏଜେନ୍ସି ଫର ଇନଫର୍ମେସନ ସିଷ୍ଟମସ ସିକ୍ୟୁରିଟି ପକ୍ଷରୁ କରାଯାଇଥିବା ଡିଜିଟାଲ ଟ୍ରେସିଂରୁ ଜାସୁସୀ ସମ୍ପର୍କରେ ସ୍ପଷ୍ଟ ସୂଚନା ମିଳିଛି। ଫ୍ରାନ୍ସ ୨୪ର ସାମ୍ବାଦିକ, ଫ୍ରାନ୍ସର ଅନୁସନ୍ଧାନଧର୍ମୀ ଓ୍ୱେବସାଇଡ ମିଡିଆ ପୋର୍ଟର ସାମ୍ବାଦିକ ଲେନେଗ ବ୍ରେଡକ୍ସ ଓ ଏହି ଓ୍ୱେବସାଇଟର ନିର୍ଦ୍ଦେଶକ ଏଡି ପ୍ଲେନେଲଙ୍କ ଫୋନରୁ ଏହି ସ୍ପାଇଓ୍ୱେୟାର ଠାବ ହୋଇଛି।
ତେବେ ଏହି ଅଭିଯୋଗକୁ ଖଣ୍ଡନ କରିଛନ୍ତି ଲେନେଗ ବ୍ରେଡକ୍ସ। ସେ କହିଛନ୍ତି ଏହା ମିଥ୍ୟା ଏବଂ ସେ ଗୁଇନ୍ଦାଗିରୀ କରିଥିବା ନେଇ ପ୍ରମାଣ ଆବଶ୍ୟକ। ଗୁଇନ୍ଦାଗିରୀ କରୁଥିବା ସନ୍ଦେହରେ ଫ୍ରାନ୍ସ ୨୪ ସାମ୍ବାଦିକଙ୍କ ଫୋନକୁ ମେ ୨୦୧୯, ସେପ୍ଟେମ୍ବର ୨୦୨୦ ଓ ଜାନୁଆରୀ ୨୦୨୧ରେ ଟାର୍ଗେଟ କରାଯ଼ାଇଥିଲା।