ଓଏଲ୍ ବ୍ୟୁରୋ: ଖୁବଶୀଘ୍ର ଓଡ଼ିଶା କଂଗ୍ରେସକୁ ମିଳିବେ ନୂଆ ମୂରବି। ୪ ମାସ ହେବ ମୁରବି ବିହୀନ ହୋଇ ରହିଛି ଓଡ଼ିଶା କଂଗ୍ରେସ। ଏବେ ବି କଂଗ୍ରେସ ମୁଖିଆ କିଏ ହେବେ ସେନେଇ ଅଙ୍କ ଛିଣ୍ଡୁନି। ଏପଟେ ଖୋଲାମଞ୍ଚରେ ଲୋକମାନଙ୍କୁ ରାଜନୀତି ସଂଖ୍ୟା ଗଣିତ ବୁଝାଇଛନ୍ତି ଅତନୁ। ଯାହାକୁ ନେଇ ବରିଷ୍ଠ କଂଗ୍ରେସ ନେତା ମହମ୍ମଦ ମୋକିମ ବଡ ପ୍ରତିକ୍ରିୟା ରଖିଛନ୍ତି।
ମହମ୍ମଦ ମୋକିମ କହିଛନ୍ତି, ଆଗାମୀ ଦିନରେ କଂଗ୍ରେସ ନିଜସ୍ବ ସରକାର କରିବ। କଂଗ୍ରେସ ନିଜ ବଳରେ ବଳିୟାନ ହେବ। ବିଜେଡି ଦିବାସ୍ବପ୍ନ ଦେଖୁଛି। ଅତନୁଙ୍କ କଥାରେ ସତ୍ୟତା ନାହିଁ। ଯେଣତେଣ ପ୍ରକାରରେ ସରକାର କରିବାକୁ ଚାହୁଛି ବିଜେଡି।ଦିଲ୍ଲୀରେ ବିଜେପି ସହ ମେଣ୍ଟ କରିବାକୁ ଚାହୁଁଥିଲା ବିଜେଡି। ବିଜେଡି ବିଶ୍ବାସର ଯୋଗ୍ୟ ନୁହେଁ, ଆମେ କେବେ ଯିବୁନି। ବିଜେଡି କଥାରେ କଂଗ୍ରେସ ଏକମତ ନୁହେଁ ବୋଲି ମୋକିମ କହିଛନ୍ତି।
ସୂଚନା ଅନୁସାରେ, ବିଜେଡି ନେତା ଅତନୁ ସବ୍ୟସାଚୀ ନାୟକ କହିଛନ୍ତି, ବିଜୁ ଜନତା ଦଳ କର୍ମୀ ଓ ନେତାଙ୍କୁ ଭରସା ମୁଁ ଦେଉଛି, ନବୀନ ପଟ୍ଟନାୟକ ପୁଣି ଥରେ ମୁଖ୍ୟମନ୍ତ୍ରୀ ହେବେ। ଓଡ଼ିଶାର ଲୋକେ ନବୀନବାବୁଙ୍କୁ ମୁଖ୍ୟମନ୍ତ୍ରୀ କରିବାକୁ ପ୍ରସ୍ତୁତ ହେଲେଣି। ଆମର ୫୧ ଓ କଂଗ୍ରେସ ୧୪ ଏବଂ ସ୍ୱାଧୀନର ୩ ବିଧାୟକଙ୍କ ସମର୍ଥନ ଅଛି। ଆଉ ମାତ୍ର ୮-୧୦ ବିଧାୟକ ଦରକାର ବୋଲି ସେ କହିଛନ୍ତି।