ଲାଡେନ ସପକ୍ଷରେ ମତ ରଖିଲା ତାଲିବାନ, କହିଲା…
କାବୁଲ: କୁଖ୍ୟାତ୍ ଆତଙ୍କୀ ମାଷ୍ଟରମାଇଣ୍ଡ ଓସାମା ବିନ ଲାଡେନ ସପକ୍ଷରେ ମତ ରଖିଛି ତାଲିବାନ। ଅଲକାଏଦାର ଏହି କୁଖ୍ୟାତ ଆତଙ୍କୀର ଇସାରାରେ ୯/୧୧ରେ ଆମେରିକାର ୱାର୍ଲ୍ଡ ଟ୍ରେଡ ସେଣ୍ଟର ଉପରେ ଭୟଙ୍କର ବିମାନ ଆକ୍ରମଣ ହୋଇଥିଲା।ଏହି କାରଣ ପାଇଁ ଆମେରିକା ଉଭୟ ତାଲିବାନ ଓ ଅଲକାଏଦ ବିରୋଧରେ ୨୦୦୧ରୁ ଯୁଦ୍ଧ ଘୋଷଣା କରିଥିଲା। ଏପରି କି ପାକିସ୍ତାନରେ ପଶି ଓସାମାକୁ ବି ମାରିଥିଲା। କିନ୍ତୁ ଏବେ ତାଲିବାନ ପୁଣି ଆଫଗାନିସ୍ତାନରେ କ୍ଷମତା ଦଖଲ କରିବା ପରେ ଓସାମା ସପକ୍ଷରେ ଯୁକ୍ତ ରଖିଛି।
ତାଲିବାନର ମୁଖପାତ୍ର ଜୈବହୁଲ୍ଲା ମୁଜାହିଦ କହିଛନ୍ତି, ୨୦୦୧ ସେପ୍ଟେମ୍ବର ୧୧ରେ ଆମେରିକା ଉପରେ ହୋଇଥିବା ଆକ୍ରମଣ ପଛରେ ଓସାମର ହାତ ଥିବା କୌଣସି ପ୍ରମାଣ ମିଳିନାହିଁ। ଓସାମା ବିନ୍ ଲାଡେନ ଯେତେବେଳେ ଆମେରିକା ପାଇଁ ବଡ଼ ପ୍ରସଙ୍ଗ ପାଲଟିଥିଲା ସେତେବେଳେ ସେ ଆଫଗାନିସ୍ତାନରେ ରହିଥିଲା। ତଥାପି ସେ ଆମେରିକା ଉପରେ ଆକ୍ରମଣ କରାଇଥିବା କୌଣସି ପ୍ରମାଣ ମିଳି ନାହିଁ।
୯/୧୧ ଘଟଣାକୁ ଇତି ମଧ୍ୟରେ ୨୦ ବର୍ଷ ବିତିଗଲାଣି। ହେଲେ ଓସାମା ହମଲାରେ ସାମିଲ ଥିବାର କୌଣସି ପ୍ରମାଣ ମିଳିନି। ପ୍ରମାଣ ନ ଥିବା ଘଟଣାକୁ ନେଇ ଯୁଦ୍ଧ ହେଲା। ଏହାକୁ ଠିକ୍ ବୋଲି ଦର୍ଶାଗଲା। ଯୁଦ୍ଧର କୌଣସି ଆବଶ୍ୟକ ନଥିଲା। କେବଳ ଯୁଦ୍ଧକୁ ଯଥାର୍ଥ ବୋଲି ସାରା ବିଶ୍ୱକୁ ଜଣାଇବା ପାଇଁ ଓସାମାକୁ ବ୍ୟବହାର କରାଯାଇଥିଲା ବୋଲି ସେ କହିଛନ୍ତି।
ଏଥିସହ ତାଲିବାନ ଆଫଗାନକୁ ଦଖଲ କରିବା ପରେ ପୁଣି ଆତଙ୍କୀ କାର୍ଯ୍ୟକଳାପ ବଢ଼ିବ ବୋଲି ଯେଉଁ ଆକଳନ କରାଯାଉଛି, ତା’ ଉପରେ ମୁଜାହିଦ ପୁଣିଥରେ ପୂର୍ଣ୍ଣଚ୍ଛେଦ ଟାଣିବାକୁ ଚେଷ୍ଟା କରିଛନ୍ତି। ସେ କହିଛନ୍ତି, ଆମେ ପୂର୍ବରୁ ମଧ୍ୟ କହି ସାରିଛି ଓ ଏବେ ବି କହୁଛୁ ଯେ ଆଫଗାନ ମାଟିକୁ କୌଣସି ଦେଶ ବିରୋଧରେ କାହାକୁ ବି ବ୍ୟବହାର କରିବାକୁ ଦିଆଯିବନି।
୨୦୦୪ରେ ସାମ୍ନାକୁ ଆସିଥିବା ଅଡିଓରେ ଲାଡେନ ସେପ୍ଟେମ୍ବର ୧୧ ଆକ୍ରମଣ ପାଇଁ ନିର୍ଦ୍ଦେଶ ଦେଉଥିବା ଜଣାପଡ଼ିଥିଲା। ୨୦୦୧ ଘଟଣା ପରେ ହିଁ ଆମେରିକା ଲାଡେନକୁ ଏଥିପାଇଁ ଦାୟୀ କରି ଆମେରିକା ତାଲିବାନକୁ ଲାଡେନର ମୁଣ୍ଡ ମାଗିଥିଲା।କିନ୍ତୁ ତାଲିବାନ ଏଥିରେ ରାଜି ନ ହେବାରୁ ଆମେରିକା ସୈନ୍ୟ ଆଫଗାନ ଯାଇ ତାଲିବାନ ବିରୋଧରେ ଯୁଦ୍ଧ ଆରମ୍ଭ କରିଥିଲେ। ଏସବୁ ଭିତରେ ଲାଡେନ ପାକିସ୍ତାନ ଚାଲି ଯାଇଥିଲା। ସେଠାକାର ଅବୋଟ୍ଟାବାଦରେ ସେ ଲୁଚି ଥିବା ବେଳେ ଆମେରିକା ସେନା ୨୦୧୧ ମସିହା ମେ’ ୧ରେ ସର୍ଜିକାଲ ଷ୍ଟ୍ରାଇକ କରି ତା’କୁ ହତ୍ୟା କରିଥିଲା। ଏବେ ପୁଣି ତାଲିବାନ ଓସାମା ବିନ୍ ଲାଡେନ ସପକ୍ଷରେ ଯୁକ୍ତି ରଖିଛି।