ଓଏଲ୍ ବ୍ୟୁରୋ: ଆଜି ବିଧାନସଭା ଶୀତକାଳୀନ ଅଧିବେଶନର ତୃତୀୟ ଦିନ। ତୃତୀୟ ଦିନରେ ବେଶ୍ ଗୃହ ସରଗରମ ରହିଛି। ବିଧାନସଭାରେ ପ୍ରଶ୍ନକାଳ ଆରମ୍ଭରୁ ହଟ୍ଟଗୋଳ ଦେଖିବାକୁ ମିଳିଛି। ଏହାରି ମଧ୍ୟରେ ଗୃହରେ କୁସୁମ ଟେଟେଙ୍କ ପ୍ରଶ୍ନରେ ପରିବହନ ମନ୍ତ୍ରୀ ଉତ୍ତର ରଖିଛନ୍ତି। ସେ କହିଛନ୍ତି, ୫ ବର୍ଷରେ ରେକର୍ଡ ଭାଙ୍ଗିଛି ସଡ଼କ ଦୁର୍ଘଟଣାଜନିତ ମୃତ୍ୟୁ।
୫ ବର୍ଷରେ ୫୪ ହଜାର ୭୯୦ଟି ସଡ଼କ ଦୁର୍ଘଟଣା ହୋଇଥିବାବେଳେ ୨୫,୯୩୪ ପ୍ରାଣ ହରାଇଛନ୍ତି। ୫ ବର୍ଷରେ ଦୁର୍ଘଟଣାରେ ୫୧,୮୭୩ ଜଣ ଆହତ ହୋଇଛନ୍ତି। ଗତବର୍ଷ କେବଳ ୫ ହଜାର ୪୬୭ ଜଣଙ୍କ ମୃତ୍ୟୁ ହୋଇଛି। ସଚେତନତା ବାବଦରେ ୫ ବର୍ଷରେ ୭୯.୧୨ ଲକ୍ଷ ଟଙ୍କା ଖର୍ଚ୍ଚ ହୋଇଛି।
ସୂଚନା ଅନୁସାରେ, ପୂର୍ବରୁ ୨୦୨୨ରେ ଘଟିଥିବା ସଡ଼କ ଦୁର୍ଘଟଣା ଓ ମୃତ୍ୟୁ ହାରର ରିପୋର୍ଟ ଆସିଥିଲା। ଏହି ରିପୋର୍ଟ ଅନୁସାରେ ସଡ଼କ ଦୁର୍ଘଟଣା ବୃଦ୍ଧି ପାଇଛି। ୨୦୨୧ ତୁଳନାରେ ୨୦୨୨ରେ ୧୧.୯ ପ୍ରତିଶତ ସଡ଼କ ଦୁର୍ଘଟଣା ବଢିଛି। ମିଳିଥିବା ରିପୋର୍ଟ ଅନୁସାରେ, ୨୦୨୨ରେ ଦେଶରେ ୪,୬୧,୩୧୨ ସଡ଼କ ଦୁର୍ଘଟଣା ହୋଇଛି।
ଦୁର୍ଘଟଣାରେ ୧ ଲକ୍ଷରୁ ଅଧିକ ଜଣଙ୍କ ମୃତ୍ୟୁ ହୋଇଥିବାବେଳେ ପାଖାପାଖି ୪ ଲକ୍ଷ ଆହତ ହୋଇଛନ୍ତି। ୨୦୨୧ ତୁଳନାରେ ୨୦୨୨ରେ ଦୁର୍ଘଟଣାଜନିତ ମୃତ୍ୟୁସଂଖ୍ୟା ୯.୪ ପ୍ରତିଶତ ବଢିଛି। ଆହତଙ୍କ ସଂଖ୍ୟା ୧୫.୩ ପ୍ରତଶତ ବୃଦ୍ଧି ହୋଇଥିବା ରିପୋର୍ଟରେ ଉଲ୍ଲେଖ କରାଯାଇଛି। ରିପୋର୍ଟ ହିସାବରେ ଦୈନିକ ୧୨୬୪ ଦୁର୍ଘଟଣା ଘଟୁଥିବାବେଳେ ୪୬୨ ଜଣଙ୍କ ମୃତ୍ୟୁ ହେଉଛି।