ଓଏଲ୍ ବ୍ୟୁରୋ: ଗତକାଲି ଥିଲା ମୁସଲିମ ମାନଙ୍କର ପର୍ବ ଇଦ୍। ଏହି ଅବସରରେ ସ୍ୱିଡେନରେ ପବିତ୍ର ଗ୍ରନ୍ଥ କୋରାନକୁ ପୋଡିଦେବା ଘଟଣା ସାମ୍ନାକୁ ଆସିଛି। ଜଣେ ପ୍ରବାସୀ ଇରାକୀ ଏକ ମସଜିଦ ବାହାରେ ଇସଲାମୀୟ ଗ୍ରନ୍ଥ କୋରାନରେ ନିଆଁ ଲଗାଇ ଦେଇଛନ୍ତି। ଯାହାକୁ ନେଇ ଚହଳ ସୃଷ୍ଟି ହୋଇଛି।
ସାଲୱାନ ମୋମିକା, ଯିଏକି ଅନେକ ବର୍ଷ ପୂର୍ବେ ଇରାକରୁ ସ୍ୱିଡେନକୁ ପଳାଇଥିଲେ। ସେ ଏହି ପୁସ୍ତକ ବିଷୟରେ ନିଜର ମତ ପ୍ରକାଶ କରିବାର ମାଧ୍ୟମ ଭାବରେ ପବିତ୍ର ପୁସ୍ତକକୁ ଜାଳି ଦେବେ ବୋଲି କହିଥିଲେ। ଏହା ସହ ଏହି ଘଟଣା ପାଇଁ ସ୍ଵିଡେନର ପୁଲିସ ତାଙ୍କୁ କହିଛି ଯେ, ଆଇନ ଅନୁସାରେ ଏଭଳି କୌଣସି ଅନୁରୋଧକୁ ପ୍ରତ୍ୟାଖ୍ୟାନ କରିବାର ନିଷ୍ପତି ଗ୍ରହଣୀୟ ନୁହେଁ।
ଖବର ଅନୁସାରେ, ସାଲୱାନ ମୋମିକା କହିଛନ୍ତି ଯେ, ଏହା ହେଉଛି ଗଣତନ୍ତ୍ର। ଯଦି ସେମାନେ ଆମକୁ କୁହନ୍ତି, ଆମେ ଏହା କରିପାରିବୁ ନାହିଁ ତେବେ ଗଣତନ୍ତ୍ର ବିପଦରେ ଅଛି ବୋଲି ସେ କହିଛନ୍ତି। ଏହି ଘଟଣା ପରେ ସୋସିଆଲ ମିଡିଆରେ ଘୁରିବୁଲୁଥିବା ଭିଡିଓରେ ମୋମିକା ପୁସ୍ତକ ଉପରେ ପାଦ ଦେଇ ଏହାକୁ ଫୋପାଡି ଦେବା ଦେଖିବାକୁ ମିଳିଛି।
ପରେ ସ୍ୱିଡେନର ପତାକା ଉତ୍ତୋଳନ କରି ଅନେକ ପୃଷ୍ଠାରେ ନିଆଁ ଲଗାଇବା ପୂର୍ବରୁ ଏହା ଉପରେ ଷ୍ଟମ୍ପିଂ କରିଥିବା ଦେଖିବାକୁ ମିଳିଛି। ଏହି ପ୍ରତିବାଦ ସୋସିଆଲ ମିଡିଆରେ ମଧ୍ୟ ତୀବ୍ର ସମାଲୋଚନାର ଶିକାର ହୋଇଥିଲା, ଅଧିକାଂଶ ଉପଭୋକ୍ତା ଏହାକୁ ଇଦ୍ ଅଲ-ଆଦା ପାଳନ କରିବାର ପ୍ରଥମ ଦିନ ସହିତ ସମକକ୍ଷ ହୋଇଥିବାରୁ ଏହାକୁ ଏକ ଉଦ୍ଦେଶ୍ୟମୂଳକ ଉତ୍ତେଜନା ବୋଲି କହିଥିଲେ।
ଅନ୍ୟପଟେ, ଏହି ଘଟଣାକୁ କଡା ନିନ୍ଦା କରିଛନ୍ତି ଋଷ ରାଷ୍ଟ୍ରପତି ଭ୍ଲାଦିମିର ପୁତିନ୍। ଏହା ସହ ସେ କହିଛନ୍ତି ଯଦି ଆମ ଦେଶରେ ଏଭଳି ଘଟଣା ଘଟିଥାନ୍ତା, ତେବେ ଏହାକୁ କେବେବି ବରଦାସ୍ତ କରାଯାଇନଥାନ୍ତା। ଜାଣିଶୁଣି କୌଣସି ସମ୍ପ୍ରଦାୟର ଧାର୍ମିକ ଭାବନାକୁ ଆଘାତ ଦେବା ଋଷରେ ଅପରାଧିକ ସଂହିତାର ଅନୁଚ୍ଛେଦ ୨୮୨ ଅନୁସାରେ ଘୋର ଅପରାଧ। କାରଣ ଏହା ରାଷ୍ଟ୍ର ଭିତରେ ଘୃଣା ଓ ଦଙ୍ଗାକୁ ସୃଷ୍ଟି କରିଥାଏ। ତେଣୁ ପ୍ରତି ଦେଶ ଏଥିପ୍ରତି ଦୃଷ୍ଟି ଦେବା ଉଚିତ ବୋଲି କହିଛନ୍ତି ପୁତିନ୍।