ଭୁବନେଶ୍ବର: ରାଜ୍ୟରେ ମିଳିବ ମଦ। ଆସନ୍ତାକାଲିଠୁ ରାଜ୍ୟରେ ଅନଲାଇନରେ ମଦ ମିଳିବ। ରାଜ୍ୟ ସରକାର ଏନେଇ ଅନୁମତି ପ୍ରଦାନ କରିଛନ୍ତି। ଏଥିସହିତ ୫୦% ଅଧିକ ଦରରେ ବିକ୍ରି ହେବ ମଦ। ସ୍ପେଶାଲ କୋଭିଡ ଫି ଲଗାଇ ସବୁ ପ୍ରକାର ମଦର ଦର ବଢାଇଲେ ସରକାର। ଅପରପକ୍ଷେ କାଉଣ୍ଟର ରେ ମଦ ବିକ୍ରିକୁ ସରକାର ଦେଲେ ନାହିଁ ଅନୁମତି। ଏଥିସହିତ ଓଡ଼ିଶା ଅବକାରୀ ନିୟମ -୨୦୧୭ ରେ ହେଲା ସଂଶୋଧନ।
କଣ୍ଟନେମଣ୍ଟ ଜୋନ ବ୍ୟତୀତ ସବୁ ଜୋନରେ ଅନଲାଇନରେ ମଦ ବିକ୍ରି ହେବ ବୋଲି ସୂଚନା ମିଳିଛି। ଅପରପକ୍ଷରେ ମଦ ଉପରେ କୋଭିଡ଼ ଫି’ ଲଗାଯାଇଛି। କୋଭିଡ଼ ଫି ୫୦% ଲଗାଯାଇଥିବାରୁ ମଦ ଦାମ ଦେଢ଼ଗୁଣା ହୋଇଯିବ। ଏମଆରପି ଉପରେ ହିଁ ଏହି ଫି’ ଲାଗୁ ହେବ। କୋଭିଡ଼ ଫି’ ବାବଦକୁ ମିଳିବାକୁ ଥିବା ଅର୍ଥ କରୋନା ଆକ୍ରାନ୍ତଙ୍କ ଚିକିତ୍ସା ପାଇଁ ଖର୍ଚ୍ଚ କରାଯିବ। ଅନ ଓ ଅଫ ଲାଇସେନ୍ସପ୍ରାପ୍ତ ମଦ ଦୋକାନୀ ହୋମ ଡେଲିଭରୀ କରିପାରିବେ। ବିଦେଶୀ ମଦ ଓ ବିୟର ଉପରେ କୋଭିଡ଼ ଫି’ ଲାଗୁ କରାଯାଇଛି।
ହୋମ୍ ଡେଲିଭରୀ ପାଇଁ କିଛି ନିର୍ଦ୍ଦିଷ୍ଟ ଠିପି ଖୋଲା ଓ ଠିପି ବନ୍ଦ ମଦ ଦୋକନାକୁ ଅନୁମତି ଦିଆଯାଇଛି। ତେବେ କେଉଁ ଦୋକାନକୁ ଅନୁମତି ଦିଆଯାଇଛି ତାହା OSBC ଓ୍ୱେବ୍ସାଇଟ୍ରେ ଉପଲବ୍ଧ ଅଛି। ଓଏସ୍ବିସି ଓ୍ୱେବ୍ ସାଇଟ୍ OSBC.Co.in ରେ ଜିଲ୍ଲା ଓ୍ୱାରୀ ଠିପି ଖୋଲା ଓ ଠିପି ବନ୍ଦ ମଦ ଦୋକାନଙ୍କ ତଥ୍ୟ ରହିଛି । ଏହା ସହ ଓ୍ୱେବ୍ସାଇଟ୍ରେ ବିଭିନ୍ନ ବ୍ରାଣ୍ଡର ମଦର ଏମ୍ଆର୍ପି ମଧ୍ୟ ଉଲ୍ଲେଖ ରହିଛି।
ଠିପି ବନ୍ଦ ଓ ଠିପି ଖୋଲା ମଦ ଦୋକାନ ସେମାନଙ୍କ ମୋବାଇଲ ନମ୍ବର, ହ୍ୱାଟ୍ସଆପ୍ ନମ୍ବର, ଇମେଲ୍, ୟୁପିଆଇ ସମ୍ବନ୍ଧରେ ନିଜ ଦୋକାନ ସାମ୍ନାରେ ବିସ୍ତୃତ ଓ ପ୍ରାଞ୍ଜଳ ଭାବେ ତଥ୍ୟ ଦେବେ। ଯାହାଦ୍ୱାରା ସେମାନେ ଅନ୍ ଲାଇନ୍ରେ ଅର୍ଡର ଗ୍ରହଣ କରିପାରିବେ । ତେବେ ଦୋକାନୀଙ୍କୁ ଏହା ନିଶ୍ଚିତ କରିବାକୁ ପଡ଼ିବ ଯେ ଦୋକାନ ଆଗରେ ଯେଭଳି ଲୋକଙ୍କ ଭିଡ଼ ନହୁଏ। ଖାଲି ସେତିକି ନୁହେଁ ରିଟେଲର ମାନେ ନିଜେ ହୋମ୍ ଡେଲିଭରୀ କରିପାରିବେ ନଚେତ୍ ହୋମ୍ ଡେଲିଭରୀ କରୁଥିବା ସଂସ୍ଥା ଯୋଗାଯୋଗ କରିପାରିବେ।
Comments are closed.