ଏବର୍ଷ ସଂସଦରେ ହେବନି ଶୀତ ଅଧିବେଶନ

ନୂଆଦିଲ୍ଲୀ: କରୋନା ମହାମାରୀ ପାଇଁ ଚଳିତ ବର୍ଷ ସଂସଦରେ ହେବ ନାହିଁ ଶୀତକାଳୀନ ଅଧିବେଶନ। ଶୀତ ଅଧିବେଶନ ନ ହେବା ନେଇ ସଂସଦୀୟ ବ୍ୟାପାର ମନ୍ତ୍ରୀ ପ୍ରହଲାଦ ଯୋଶୀ କହିଛନ୍ତି କି, ମହାମାରୀ କରୋନାକୁ ବ୍ୟାପିବାରୁ ରୋକିବା ପାଇଁ ଶୀତ ଅଧିବେଶନକୁ ବନ୍ଦ ରଖାଯାଇଛି। ସମସ୍ତ ରାଜନୈତିକ ଦଳ ଶୀତ ଅଧିବେଶନକୁ ବନ୍ଦ ରଖି ସିଧାସଳଖ ଜାନୁଆରୀରେ ହେବାକୁ ଥିବା ବଜେଟ୍‌ ଅଧିବେଶନ ପ‌ାଇଁ ସହମତି ଦେଇଛନ୍ତି।

ବିବାଦୀୟ ନୂଆ କୃଷି ଆଇନ୍‌ ଉପରେ ଆଲୋଚନା କରିବାକୁ କଂଗ୍ରେସ ନେତା ଅଧୀର ରଞ୍ଜନ ଚୌଧୁରୀଙ୍କ ପତ୍ରର ଉତ୍ତର ଦେଇ ଶ୍ରୀ ଯୋଶୀ ଶୀତକାଳୀନ ଅଧିବେଶନ ହେବ ନାହିଁ ବୋଲି ସ୍ପଷ୍ଟ କରିଛନ୍ତି। କଂଗ୍ରେସର ଲୋକସଭା ନେତା ଅଧୀର ରଞ୍ଜନ ଚୌଧୁରୀ ଏହି ଆଇନରେ ସଂଶୋଧନ କରିବାର ଆବଶ୍ୟକତା ଉପରେ ଗୁରୁତ୍ୱାରୋପ କରି ଏହା ଉପରେ ଆଲୋଚନା ପାଇଁ ପ୍ରସ୍ତାବ ଦେବା ପରେ ଏହାର ଉତ୍ତର ରଖିଛନ୍ତି ଶ୍ରୀ ଯୋଶୀ।

ତାଙ୍କ ଚିଠିର ଉତ୍ତର ଦେଇ ମନ୍ତ୍ରୀ ପ୍ରହଲାଦ ଯୋଶୀ କହିଛନ୍ତି କି, ସେ ସମସ୍ତ ଦଳର ନେତାଙ୍କ ସହ କଥା ହୋଇ ଶୀତ ଅଧିବେଶନ ବନ୍ଦ କରିବା ପାଇଁ ସହମତି ପାଇଛନ୍ତି। ଆପଣଙ୍କ ସୂଚନା ସକାଶେ ଜଣାଇ ଦେଉଛୁୁ ଯେ, ଗତ ସେପ୍ଟେମ୍ବରରେ ସଂସଦରେ ମୌସୁମୀ ଅଧିବେଶନ ଡକାଯାଇଥିଲା।

ସଂସଦୀୟ ବ୍ୟାପାର ମନ୍ତ୍ରୀ କଂଗ୍ରେସ ନେତା ଚୌଧୁରୀଙ୍କୁ ଉତ୍ତର ଲେଖି ଜଣାଇଛନ୍ତି ଯେ ଶୀତ ଦିନେ ଭାଇରସ୍‌ ବ୍ୟାପିବାର ଅଧିକ ଆଶଙ୍କା ରହିଥିବା କାରଣରୁ ଶୀତକାଳୀନ ଅଧିବେଶନକୁ ବନ୍ଦ ରଖିବା ନିଷ୍ପତ୍ତି ନିଆଯାଇଛି। ଏହାଛଡ଼ା ଖୁବ୍‌ ଶୀଘ୍ର କରୋନା ଟିକା ଉପଲବ୍ଧ ହେବ ବୋଲି ଆଶା କରାଯାଉଛି। ଏହି କାରଣରୁ ପରବର୍ତ୍ତୀ ଅଧିବେଶନ ପାଇଁ କୌଣସି ସମସ୍ୟା ଉପୁଜି ନପାରେ ବୋଲି କୁହାଯାଇଛି।