ମେ’ ୨୫ ଯାଏଁ ଲକ୍ଡାଉନ ଅବଧି ବୃଦ୍ଧି କଲେ ସରକାର
ଲକଡାଉନ ଅବଧି ଆଉ ୧୦ ଦିନ ବୃଦ୍ଧି
ପାଟନା: ଦେଶରେ ଅଣାୟତ୍ତ ହେଲାଣି ମହାମାରୀ କରୋନା। କରୋନା ସଂକ୍ରମଣକୁ ଦୃଷ୍ଟିରେ ରଖି ବିଭିନ୍ନ ରାଜ୍ୟ ଲକଡାଉନ ଅବଧି ବୃଦ୍ଧି କରିବାରେ ଲାଗିଛନ୍ତି। ଆଜି ମହାରାଷ୍ଟ୍ର ସରକାର ଲକଡାଉନ ଅବଧିକୁ ଜୁନ୍ ୧ ତାରିଖ ସକାଳ ୭ଟା ଯାଏ ବୃଦ୍ଧି କରିଥିବା ବେଳେ ଏବେ ବିହାର ସରକାର ମଧ୍ୟ ଲକଡାଉନ ଅବଧି ବୃଦ୍ଧି କରିଛନ୍ତି।
ବିହାରରେ ଲାଗିଥିବା ଲକଡାଉନ ଅବଧି ମେ’ ୧୬ ତାରିଖ ସକାଳେ ଶେଷ ହୋଇଥାଆନ୍ତା। ହେଲେ ମୁଖ୍ୟମନ୍ତ୍ରୀ ନୀତିଶ କୁମାର ଏହାକୁ ଆଉ ୧୦ ଦିନ ବୃଦ୍ଧି କରିଛନ୍ତି। ବିହାରରେ ମେ’ ୨୫ ଯାଏ ଲକଡାଉନ ବଳବତ୍ତର ରହିବ।
आज सहयोगी मंत्रीगण एवं पदाधिकारियों के साथ बिहार में लागू लॉकडाउन की स्थिति की समीक्षा की गयी। लॉकडाउन का सकारात्मक प्रभाव दिख रहा है। अतः बिहार में अगले 10 दिनों अर्थात 16 से 25 मई, 2021 तक लॉकडाउन को विस्तारित करने का निर्णय लिया गया है।
— Nitish Kumar (@NitishKumar) May 13, 2021
ମୁଖ୍ୟମନ୍ତ୍ରୀ ନୀତିଶ କୁମାର ଟ୍ୱିଟ କରି କହିଛନ୍ତି, “ଆଜି ସହଯୋଗୀ ମନ୍ତ୍ରୀଗଣ ଓ ପଦାଧିକାରୀଙ୍କ ସହ ବିହାରରେ ଲାଗିଥିବା ଲକଡାଉନ ସ୍ଥିତିର ସମୀକ୍ଷା କରାଯାଇଥିଲା। ଲକଡାଉନର ସକରାତ୍ମକ ପ୍ରଭାବ ବର୍ତ୍ତମାନ ଦେଖିବାକୁ ମିଳୁଛି। ତେଣୁ ସର୍ବସମ୍ମତିକ୍ରମେ ବିହାରରେ ଆଉ ୧୦ ଦିନ ଅର୍ଥାତ ୧୬ରୁ ୨୫ ତାରିଖ ଯାଏ ଲକଡାଉନ ବୃଦ୍ଧି କରିବାକୁ ନିଷ୍ପତ୍ତି ହୋଇଛି।”
ଲକଡାଉନ୍ ସମୟରେ ପୂର୍ବଭଳି ଅତ୍ୟାବଶ୍ୟକ ସାମଗ୍ରୀ ଓ ଫଳ, ପନିପରିବା, ମାଂସ, ମାଛ, କ୍ଷୀର, ପିଡିଏସ୍ ଦୋକାନ ସକାଳ ୭ ଟାରୁ ୧୧ଟା ଯାଏ ଖୋଲା ରହିବ। ଜରୁରୀ ସେବାରେ ନିୟୋଜିତ କର୍ମଚାରୀ ନିଜର ପରିଚୟପତ୍ର ଦେଖାଇ ଯିବା ଆସିବା କରିପାରିବେ।