ଓଏଲ୍ ବ୍ୟୁରୋ: ବର୍ଷର ପ୍ରଥମ ମ୍ୟାଚକୁ ଜିତି ନେଇଛି ଭାରତ। ଶେଷ ବଲରେ ଦମଦାର ବିଜୟ ହାସଲ କଲା ଟିମ୍ ଇଣ୍ଡିଆ । ଶ୍ରୀଲଙ୍କାକୁ ୨ ରନରେ ପରାସ୍ତ କରି ଟି-୨୦ ସିରିଜରେ ୧-୦ରେ ଆଗୁଆ ରହିଛି ଟିମ୍ ଇଣ୍ଡିଆ। ଭାରତୀୟ ଦଳ ପ୍ରଥମେ ବ୍ୟାଟିଂ କରି ନିର୍ଦ୍ଧାରିତ ଓଭରରେ ୫ ଓ୍ବିକେଟ ହରାଇ ୧୬୨ ରନ୍ କରିଥିଲା। ୧୬୩ ରନର ବିଜୟ ଲକ୍ଷ୍ୟକୁ ପିଛା କରି ଶ୍ରୀଲଙ୍କା ଦଳ ନିର୍ଦ୍ଧାରିତ ଓଭରରେ ସମସ୍ତ ଓ୍ବିକେଟ ହରାଇ ୧୬୦ ରନ୍ କରିଥିଲା। ଯାହାଫଳରେ ଟିମ୍ ଇଣ୍ଡିଆ ବର୍ଷର ପ୍ରଥମ ମ୍ୟାଚରେ ବିଜୟୀ ହୋଇଛି ।
୧୬୩ ରନର ବିଜୟ ଲକ୍ଷ୍ୟକୁ ପିଛା କରି ଶ୍ରୀଲଙ୍କା ଦଳ ୧୬୦ ରନରେ ଅଲଆଉଟ୍ ହୋଇ ଯାଇଥିଲା। ଶ୍ରୀଲଙ୍କା ପକ୍ଷରୁ ଦାସୁନ ସନକା ୪୫ ରନ, କୁଶଲ ମେଣ୍ଡିସ ୨୮ରନ ଓ ଚମିକା କରୁଣାରତ୍ନେ ୨୩ରନ କରିଥିଲେ । ଭାରତ ପକ୍ଷରୁ ଶିବମ ମାଭି ୪ଟି, ଉମରାନ ମଲ୍ଲିକ ଓ ହର୍ସଲ ପଟେଲ ୨ଟି ଲେଖାଏଁ ଓ୍ବିକେଟ ନେଇଥିଲେ।
ଟସ୍ ଜିତି ପ୍ରଥମେ ବୋଲିଂ କରିବାର ନିଷ୍ପତ୍ତି ନେଇଥିଲା ଶ୍ରୀଲଙ୍କା। ଭାରତ ପକ୍ଷରୁ ଦୁଇ ଯୁବ ଅପନର ଶୁଭମନ ଗିଲ ଓ ଇଶାନ କିଷନ ଇନିଂସ୍ ଓପନ କରିଥିଲେ । ଦଳୀୟ ସ୍କୋର ୨୭ ରନ୍ ହୋଇଥିବା ବେଳେ ଦଳକୁ ଲାଗିଥିଲା ପ୍ରଥମ ଝଟକା । ଟି-୨୦ ଡେବ୍ୟୁ କରିଥିବା ଶୁଭମନ ଗିଲ୍ ମାତ୍ର ୭ ରନ୍ କରି ପ୍ୟାଭିଲିଅନ୍ ଫେରିଥିଲେ । ଏହାପରେ ଟି-୨୦ ସ୍ପେଶାଲିଷ୍ଟ ସୂର୍ଯ୍ୟକୁମାର ଯାଦବ ବ୍ୟାଟିଂ କରିବାକୁ ପଡ଼ିଆକୁ ଓହ୍ଲାଇଥିଲେ। ହେଲେ ସେ ମାତ୍ର ୭ ରନ୍ କରି ପ୍ୟାଭିଲିଅନ୍ ଫେରିଥିଲେ । ଏହାପରେ ସଞ୍ଜୁ ସାମସନ୍ ମଧ୍ୟ ୫ ରନ୍ କରି ପ୍ୟାଭିଲିଅନ୍ ଫେରିଥିଲେ ।
୭୭ ରନରେ ୪ ଓ୍ବିକେଟ ହରାଇ ସଙ୍କଟରେ ଥିବା ଭାରତୀୟ ଦଳକୁ ସାହା ହୋଇଥିଲେ କ୍ୟାପଟେନ୍ ହାର୍ଦ୍ଦିକ ପାଣ୍ଡ୍ୟା । ଆଉ ସଙ୍କଟମୋଚକ ଭଳି ଦଳ ପାଇଁ ରନ୍ ସଂଗ୍ରହ କରିଥିଲେ ଦୀପକ ହୁଡ଼ା। ହାର୍ଦ୍ଦିକ ୨୭ ରନ୍ କରି ଆଉଟ ହେବା ପରେ ବ୍ୟାକଫୁଟରେ ଥିଲା ଟିମ୍ ଇଣ୍ଡିଆ। ହେଲେ ଦୀପକ ହୁଡ଼ା ଓ ଅକ୍ଷର ପଟେଲ ଦଳ ପାଇଁ ରନ୍ ଯୋଡ଼ିଥିଲେ। ହୁଡ଼ା ୪୧ ଓ ଅକ୍ଷର ୩୧ ରନର ଅପରାଜିତ ଇନିଂସ ବଳରେ ଭାରତ ନିର୍ଦ୍ଧାରିତ ଓଭରରେ ୧୬୨ ରନ୍ ସ୍କୋର କରିଥିଲା ।
ଶ୍ରୀଲଙ୍କା ପକ୍ଷରୁ ଦିଲଶାନ, ଠିକଶନା, କରୁଣାରତ୍ନେ, ଧନଞ୍ଜୟ ଓ ହର୍ଷଙ୍ଗା ଗୋଟିଏ ଲେଖାଏଁ ଓ୍ବିକେଟ ନେଇଥିଲେ ।