ପାକିସ୍ତାନର ଷଡ଼ଯନ୍ତ୍ରକୁ ପଦାରେ ପକାଇଲା ଭାରତୀୟ ସେନା, ଦେଖନ୍ତୁ ଭିଡିଓ

ନୂଆଦିଲ୍ଲୀ: ପୁଣି ଥରେ ପଦାରେ ପଡ଼ିଛି ପାକିସ୍ତାନର ଷଡ଼ଯନ୍ତ୍ର। ପାକିସ୍ତାନର ହୀନ ପ୍ରୟାସକୁ ବିଫଳ କରିଛି ଭାରତୀୟ ସେନା। ଜମ୍ମୁ-କାଶ୍ମୀରରେ ଅନୁପ୍ରବେଶ କରିବାକୁ ପାକିସ୍ତାନ ସମର୍ଥିତ ଆତଙ୍କୀ ଓ ପାକ୍ କମାଣ୍ଡୋ ଲଗାତାର ପ୍ରୟାସ କରୁଛନ୍ତି। ଆଉ ଏଲଓସିରେ ପାକିସ୍ତାନ ଦେଖାଇଥିବା ଦୁଃସାହାସର ଏକ ଭିଡିଓ ଫୁଟେଜ ସାମ୍ନାକୁ ଆସିଛି। ଯେଉଁଥିରେ ଆତଙ୍କବାଦୀମାନେ ଭାରତୀୟ ସୀମାକୁ ଅନୁପ୍ରବେଶ ଉଦ୍ୟମ କରୁଥିବା ଦେଖିବାକୁ ମିଳିଛି। ପାକିସ୍ତାନ ବର୍ଡର ଆକ୍ସନ ଟିମ ଓ ଆତଙ୍କବାଦୀଙ୍କ ଅନୁପ୍ରବେଶ ଉଦ୍ୟମକୁ ପଣ୍ଡ କରିଛି ଭାରତୀୟ ସେନା। ଆଉ ସେହି ସମୟର ଭିଡିଓ ଏବେ ସାମ୍ନାକୁ ଆସିଛି। ଯାହା ଏବେ ଭାଇରାଲ ହେବାରେ ଲାଗିଛି।

ସେପ୍ଟେମ୍ବର ୧୨ ଓ ୧୩ ତାରିଖରେ ହାଜିପୁରା ସେକ୍ଟରରେ ବାଟ ଓ ଆତଙ୍କୀଙ୍କ ଅନୁପ୍ରବେଶ ଉଦ୍ୟମର ଭିଡିଓ ଫୁଟେଜ ଏବେ ସମସ୍ତେ ଦେଖୁଛନ୍ତି। ଅନୁପ୍ରବେଶ ଉଦ୍ୟମ ବେଳେ ଭାରତୀୟ ସୁରକ୍ଷା କର୍ମୀ ଗ୍ରେନେଡ ମାଡ କରି ତାଙ୍କ ଅନୁପ୍ରବେଶ ଉଦ୍ୟମକୁ ବିଫଳ କରିଦେଇଛନ୍ତି। କେବଳ ହାଜିପୁରା ନୁହେଁ ପାକ ବର୍ଡର ଆକ୍ସନ ଟିମର ବହୁବାର ଅନୁପ୍ରବେଶ ଉଦ୍ୟମକୁ ଭାରତୀୟ ଯବାନ ପଣ୍ଡ କରିଛନ୍ତି। କଶ୍ମୀରରୁ ଧାରା ୩୭୦ ଉଚ୍ଛେଦ ହେବା ପରେ ପରଠୁ ପାକିସ୍ତାନ ସେନା ସୀମାରେ ଷଡଯନ୍ତ୍ର ଚଳାଇଛନ୍ତି। ଏଲଓସି ଠାରୁ ମାତ୍ର ୨ କିଲୋମିଟର ଦୁରେ ଏବେ ଆତଙ୍କବାଦୀ ଲଂଚପ୍ୟାଡ ସକ୍ରିୟ କରାଯାଇଛି। ଯେଉଁଠି ତାଲିମପ୍ରାପ୍ତ ୨୪୦ ଜଣ ଆତଙ୍କବାଦୀ ଭାରତରେ ଅନୁପ୍ରବେଶ କରିବାକୁ ସୁଯୋଗ ଅପେକ୍ଷାରେ ରହିଛନ୍ତି।

#WATCH Army sources: Infiltration or attempted BAT(Border Action Team) action by Pakistan on 12-13 Sept 2019, was seen&eliminated. In video, Indian troops can be seen launching grenades at Pak's SSG(Special Service Group) commandos/terrorists using Under Barrel Grenade Launchers. pic.twitter.com/KOnYJPWyV8

— ANI (@ANI) September 18, 2019

ପୂର୍ବରୁ ଗୁରେଜ, ମାଛିଲ, କେରନ, ତଙ୍ଗଧାର, ପୁନଛରେ ମଧ୍ୟ ଅନୁପ୍ରବେଶ ଉଦ୍ୟମ କରିଛନ୍ତି ପାକ କମାଣ୍ଡୋ ଓ ଆତଙ୍କବାଦୀ। ଏହାଛଡା ଭିନ୍ନ ଭିନ୍ନ ସମୟରେ ଏଲଓସିର ନିକଟତମ ଅଂଚଳରେ ଅନୁପ୍ରବେଶ ଉଦ୍ୟମ କରାଯାଉଥିବା ସୂଚନା ମିଳିଛି। ତେବେ ସୀମାରେ ଭାରତୀୟ ଯବାନଙ୍କ କଡା ସୁରକ୍ଷା ଯୋଗୁଁ ପାକିସ୍ତାନର ଷଡଯନ୍ତ୍ର ପ୍ରତି ଥର ବିଫଳ ହୋଇଛି।