ପୁଣେ: ୫ବର୍ଷ ପରେ ଅନ୍ତିମ ଏକାଦଶରେ ସ୍ଥାନ ପାଇ ବିରଳ ରେକର୍ଡର ଅଧିକାରୀ ହେଲେ ସଞ୍ଜୁ ସାମସନ୍। ୱିକେଟକିପର ବ୍ୟାଟ୍ସମ୍ୟାନ୍ ସଞ୍ଜୁ ସାମସନ୍ ଶ୍ରୀଲଙ୍କା ବିପକ୍ଷ ତୃତୀୟ ତଥା ଅନ୍ତିମ ଟି-୨୦ ଅନ୍ତର୍ଜାତୀୟ ମ୍ୟାଚରେ ସ୍ଥାନ ପାଇଥିଲେ। ସେ ଦୁଇ ମ୍ୟାଚ୍ ମଧ୍ୟରେ ସର୍ବାଧିକ ମ୍ୟାଚ୍ ବାହାରେ ରହିବାରେ ନୂଆ ରେକର୍ଡ କରିଛନ୍ତି।
ସାମସନ୍ ନିଜର ଏକମାତ୍ର ଅନ୍ତର୍ଜାତୀୟ ଟି-୨୦ ମ୍ୟାଚ୍ ୧୯ ଜୁଲାଇ, ୨୦୧୫ରେ ଜିମ୍ବାୱେ ବିପକ୍ଷରେ ଖେଳିଥିଲେ। ଏହା ମଧ୍ୟରେ ଭାରତ ୭୩ ଅନ୍ତର୍ଜାତୀୟ ଟି-୨୦ ମ୍ୟାଚ୍ ଖେଳିସାରିଛି ଏବଂ ଶୁକ୍ରବାର ସାମସନଙ୍କୁ ସୁଯୋଗ ମିଳିଛି। ତେବେ ସାମସନ୍ ନିଜକୁ ମିଳିଥିବା ଏହି ସୁଯୋଗର ପାଇଦା ଉଠାଇପାରି ନାହାନ୍ତି ଏବଂ ମାତ୍ର ୬ ରନ୍ କରି ଆଉଟ୍ ହୋଇଥିଲେ।
ସେ କ୍ରିଜକୁ ଆସିବା ମାତ୍ରକେ ପ୍ରଥମ ବଲରେ ଛକା ମାରି ଖାତା ଖୋଲିଥିଲେ। କିନ୍ତୁ ପରବର୍ତ୍ତୀ ବଲରେ ୱାନିନ୍ଦୁ ହସରଙ୍ଗାଙ୍କ ବଲରେ ଏଲବିଡବ୍ଲ୍ୟୁ ହୋଇଯାଇଥିଲେ। ଏହା ପୂର୍ବରୁ ରେକର୍ଡ ଉମେଶ ଯାଦବଙ୍କ ନାଁରେ ଥିଲା, ଯିଏ ୨୦୧୨ରୁ ୨୦୧୮ ପର୍ଯ୍ୟନ୍ତ ୬୫ ଟି-୨୦ ଅନ୍ତର୍ଜାତୀୟ ମ୍ୟାଚରେ ଖେଳିନଥିଲେ। ତାଙ୍କ ପରେ ଦିନେଶ କାର୍ତ୍ତିକ (୫୬) ଓ ମହମ୍ମଦ ଶାମି (୪୩)ଙ୍କ ନମ୍ବର ଆସିବ।
Comments are closed.