ଓଏଲ୍ ବ୍ୟୁରୋ: ରାଜ୍ୟରେ ଥମୁନାହିଁ ନିର୍ବାଚନ ହିଂସା। ଗତକାଲି ଚାନ୍ଦବାଲି କରଞ୍ଜମାଳ ଠାରେ ବିଜେପି ରାଜ୍ୟ ଯୁବମୋର୍ଚ୍ଚା ସଭାପତି ଓ ତାଙ୍କ ସହ ଥିବା ବ୍ୟକ୍ତିଙ୍କୁ ଆକ୍ରମଣ ହୋଇଥିବା ଘଟଣା ସାମ୍ନାକୁ ଆସିଥିଲା। ଭାରତୀୟ ଜନତା ପାର୍ଟିର ଯୁବମୋର୍ଚ୍ଚା ସଭାପତି ଅଭିଳାଷ ପଣ୍ଡା ଓ ତାଙ୍କ ସହଯୋଗୀଙ୍କୁ ବିଜେଡି କର୍ମୀ ମାନେ ମରଣାନ୍ତକ ଆକ୍ରମଣ କରିଥିବା ଅଭିଯୋାଗ ହୋଇଛି। ଏହି ଘଟଣାର ତଦନ୍ତ କରି ପୁଲିସ ୫ ଜଣଙ୍କୁ ଗିରଫ କରିଛି। ଗିରଫ ହୋଇଥିବା ୫ ଜଣ ଯାକ ବିଜେଡି କର୍ମୀ ବୋଲି ସୂଚନା ରହିଛି। ସେପଟେ ବିଜେଡି ମଧ୍ୟ ପାଲଟା ଏତଲା ଦେଇଛି। ଚାନ୍ଦବାଲି ବିଜେଡି ତରଫରୁ ୧୧ ଜଣଙ୍କ ନାମରେ ଅଭିଯୋଗ କରାଯାଇଛି।
ମିଳିଥିବା ସୂଚନା ଅନୁଯାୟୀ, ନିର୍ବାଚନ ପ୍ରଚାର ସାରି ଫେରିବାବେଳେ ଶଶିକାଦେଇପୁର ନିକଟରେ ବିଜେପି ଯୁବ ମୋର୍ଚ୍ଚାର ସଭାପତିଙ୍କ ସମେତ ତାଙ୍କ ସହଯୋଗୀଙ୍କୁ କାର୍ଯ୍ୟଙ୍କୁ କିଛି ବିଜେଡି କର୍ମୀ ଆକ୍ରମଣ କରିଥିବା ଅଭିଯୋଗ କରାଯାଇଛି। ବିଜେଡି କର୍ମୀଙ୍କ ଆକ୍ରମଣରେ ଅଭିଳାଷଙ୍କ ମୁଣ୍ଡ ଫାଟିଯାଇଛି। ଅଭିଳାଷଙ୍କ ସହଯୋଗୀ ମଧ୍ୟ ଗୁରୁତର ଆହତ ହୋଇଥିବା ଜଣାପଡ଼ିଛି। ଉଭୟଙ୍କୁ ଚିକିତ୍ସା ପାଇଁ ମେଡ଼ିକାଲରେ ଭର୍ତ୍ତି କରାଯାଇଛି। ଏହି ଆକ୍ରମଣ ଘଟଣାକୁ ନେଇ ବାଂଶଡ଼ା ଥାନାରେ ବିଜେପି କର୍ମୀ ଅଭିଯୋଗ କରିଥିବା ସୂଚନା ମିଳିଛି।
ଅନ୍ୟପଟେ ଏଭଳି ଘଟଣାକୁ ନିନ୍ଦା କରିଛନ୍ତି ବିଜେପି ରାଜ୍ୟ ସଭାପତି ମନମୋହନ ସାମଲ। ସେ କହିଛନ୍ତି, ଆମ ଭାରତୀୟ ଜନତା ଯୁବମୋର୍ଚ୍ଚାର ରାଜ୍ୟ ସଭାପତି ଅଭିଳାଷ ପଣ୍ଡା, ଯୁବମୋର୍ଚ୍ଚା ରାଜ୍ୟ ଉପସଭାପତି ସୁଜିତ ସିଂ, ଯୁବମୋର୍ଚ୍ଚା ରାଜ୍ୟ ସମ୍ପାଦକ ପ୍ରଶାନ୍ତ ପାଇକରାୟ ଏବଂ ସୁବ୍ରତ କୁମାର ବିଶ୍ବାଳ ଚାନ୍ଦବାଲି ବିଧାନସଭା ଅନ୍ତର୍ଗତ ଧାମରା ମଣ୍ଡଳରୁ ନିର୍ବାଚନ ପ୍ରଚାର କରି ଫେରିବା ସମୟରେ କରଞ୍ଜମାଳ ପଞ୍ଚାୟତର ଧାନକୁଟା ଗ୍ରାମ ନିକଟରେ ଶାସକ ଦଳର କିଛି କର୍ମୀ ତାଙ୍କୁ ସଂଘବଦ୍ଧ ଭାବେ ମରଣାନ୍ତକ ଆକ୍ରମଣ କରି ରକ୍ତାକ୍ତ କରିବା ଅତ୍ୟନ୍ତ ନିନ୍ଦନୀୟ ବିଷୟ। ଏହି ଘଟଣାର ସତ୍ୟାସତ୍ୟ ତଦନ୍ତ କରି ଶାସକ ଦଳର ଅଭିଯୁକ୍ତମାନଙ୍କୁ ଉଚିତ ଦଣ୍ଡ ଦେବା ନିମନ୍ତେ ପ୍ରଶାସନକୁ ଅନୁରୋଧ କରୁଛି ବୋଲି ଶ୍ରୀ ସାମଲ କହିଛନ୍ତି।