ନୂଆଦିଲ୍ଲୀ: ପୁଣି ଲୋକମାନଙ୍କ ମନରେ ଭୟ ସୃଷ୍ଟି କଲାଣି କରୋନାର ଦ୍ବିତୀୟ ଷ୍ଟ୍ରେନ୍। ବ୍ରିଟେନରେ କରୋନା ଭାଇରସ ନୂଆ ଷ୍ଟ୍ରେନକୁ ନେଇ ସାରା ବିଶ୍ୱରେ ଆତଙ୍କ ଖେଳିଯାଇଛି। ଭୂତାଣୁର ନୂଆ ପ୍ରକାରକୁ ନେଇ ସୂଚନା ମିଳିବା ପରଠାରୁ ଭାରତ ସମେତ ୨୦ରୁ ଅଧିକ ଦେଶ ବ୍ରିଟେନ ସହ ବିମାନ ଯୋଗାଯୋଗ ବିଛିନ୍ନ କରିଛନ୍ତି। ଭାରତ ଡିସେମ୍ବର ୩୧ ତାରିଖ ମଧ୍ୟ ରାତ୍ର ପର୍ଯ୍ୟନ୍ତ ବ୍ରିଟେନକୁ ବିମାନ ସେବା ବନ୍ଦ କରିଛି।
ତେବେ କଟକଣା ଲାଗୁ ପୂର୍ବରୁ ଆସିସାରିଥିବା ଯାତ୍ରୀଙ୍କ ତଲାସ ଆରମ୍ଭ କରିଛନ୍ତି ସରକାର। ବ୍ରିଟେନରେ ଭୂତାଣୁର ନୂଆ ପ୍ରକାର ଚିହ୍ନଟ ପରେ ଭାରତ ସରକାର ଗତ ୧୦ ଦିନରେ ଦେଶକୁ ବ୍ରିଟେନରୁ ଫେରିଥିବା ଲୋକଙ୍କ ସନ୍ଧାନ କରୁଛନ୍ତି। ସେମାନଙ୍କ ଜରୁରି ଆରଟି-ପିସିଆର ପରୀକ୍ଷଣ କରାଯାଉଥିବା ବେଳେ ଏପର୍ଯ୍ୟନ୍ତ ଅନୁନ୍ୟ ୨୦ ଜଣ ସଂକ୍ରମିତ ଚିହ୍ନଟ ହେଲେଣି।
ତେବେ କେହି କୋଭିଡ ନୂଆ ପ୍ରକାରରେ ଆକ୍ରାନ୍ତ ହୋଇଛନ୍ତି କି ନା ତାହା ଜାଣିବା ଲାଗି ଏହି ପରୀକ୍ଷଣ କରାଯାଉଥିବା ବେଳେ ଏପର୍ଯ୍ୟନ୍ତ ୨୦ ଜଣ କୋଭିଡ ପଜିଟିଭ ଚିହ୍ନଟ ହେଲେଣି। ତେବେ କୋଭିଡ ନୂଆ ଷ୍ଟ୍ରେନ ଯୋଗୁ ଆକ୍ରାନ୍ତଙ୍କ ମାମଲାର ଜଟିଳତା ଓ ମୃତ୍ୟୁହାର ବଢିବନି ବୋଲି ନୀତି ଆୟୋଗ ସଦସ୍ୟ ଡା. ବି.କେ. ପାଲ କହିଛନ୍ତି। ସେହିପରି ଦେଶରେ କରୋନା ଭାଇରସ ମହାମାରୀ ମୁକାବିଲା ଲାଗି ପ୍ରସ୍ତୁତ ହେଉଥିବା ଭାକ୍ସିନ ଉପରେ ମଧ୍ୟ ନୂଆ ପ୍ରକାର ଭୂତାଣୁର କୌଣସି ପ୍ରଭାବ ପଡିବନି ବୋଲି ସେ କହିଛନ୍ତି ।
ବ୍ରିଟେନରେ ଭୂତାଣୁର ନୂଆ ସ୍ୱରୁପ ଜଣାପଡିବା ପରେ ମୃତ୍ୟୁ ହାର ଉପରେ ଏହାର ଏପର୍ଯ୍ୟନ୍ତ ପ୍ରଭାବ ଜଣାପଡି ନାହିଁ। ତେବେ ଏଥିଯୋଗୁ କେବଳ ସଂକ୍ରମଣର ଆଶଙ୍କା ବଢି ଯାଇଥିବା ଡା. ପାଲ କହିଛନ୍ତି।
Comments are closed.