ଓଏଲ୍ ବ୍ୟୁରୋ: ବାଲେଶ୍ବର ଜିଲ୍ଲା ବାହାନଗା ଷ୍ଟେସନ ନିକଟରେ ଭୟଙ୍କର ଟ୍ରେନ ଦୁର୍ଘଟଣା। ଦୁଇଟି ଏକ୍ସପ୍ରେସ୍ ଧକ୍କା ହେବାରୁ ୭୦ରୁ ଉର୍ଦ୍ଧ୍ବ ଜୀବନ ଚାଲିଯାଇଥିବା ବେଳେ ୪୦୦ରୁ ଅଧିକ ଆହତ ହୋଇଥିବା ସୂଚନା ରହିଛି। ଉଦ୍ଧାର କାର୍ଯ୍ୟ ଜାରି ରହିଥିବାରୁ ଏହି ସଂଖ୍ୟା ଆହୁରି ବୃଦ୍ଧି ହୋଇପାରେ। ତେବେ ମୃତ୍ୟୁ ସଂଖ୍ୟା ୧୦୦ ଛୁଇଁବା ଆଶଙ୍କା ରହିଛି।
ଗୁରୁତର ଆହତଙ୍କୁ କଟକ ଏସ୍ସିବି ମେଡିକାଲକୁ ସ୍ଥାନାନ୍ତର କରାଯାଉଛି। ବାଲେଶ୍ୱର, ଭଦ୍ରକ, ସୋର ଡାକ୍ତରଖାନାରେ ଡକ୍ତାର ନଥିବାରୁ ଚିକିତ୍ସାରେ ଅସୁବିଧା ଦେଖାଯାଉଛି। ତେବେ ସରକାରୀ ଭାବେ ମୃତାହତ ସଂଖ୍ୟା ଘୋଷଣା କରାଯାଇନାହିଁ। ସବୁଠୁ ବଡ଼ କଥା ହେଲା ଆହତଙ୍କ ଚିକିତ୍ସା ପାଇଁ ରକ୍ତର ଆବଶ୍ୟକତା ରହିଥିବା ବେଳେ ରକ୍ତ ଭଣ୍ଡାରରେ ଆବଶ୍ୟକ ମୁତାବକ ରକ୍ତ ନାହିଁ। ଏହି ଖବର ପ୍ରସାରଣ ପରେ ବାଲେଶ୍ବରବାସୀ ସ୍ବଇଚ୍ଛାରେ ରକ୍ତ ଦାନ କରିବା ପାଇଁ ମେଡିକାଲ ପରିସରରେ ଲମ୍ବା ଲାଇନ୍ କରିଛନ୍ତି। ଯାହାର ଫଟୋ ଏବେ ସୋସିଆଲ ମିଡିଆରେ ଘୁରି ବୁଲୁଛି।
ଏହି ବିପଦ ସମୟରେ ବାଲେଶ୍ବରବାସୀ ମାନବିକତା ଦେଖାଇବା ସହିତ ଆହତଙ୍କ ଜୀବନ ବଞ୍ଚାଇବାକୁ ଏକଜୁଟ ହୋଇଛନ୍ତି। ସେହିପରି କଟକ ବଡମେଡିକାଲକୁ ଆସୁଥିବା ଗୁରୁତର ଆହତଙ୍କୁ ରକ୍ତ ଦେବା ପାଇଁ ବିଜେପି କର୍ମୀ ମାନେ ସ୍ବଇଚ୍ଛାରେ ରକ୍ତଦାନ କରିବାକୁ ଆସିଛନ୍ତି।
ଦୁର୍ଘଟଣା ହେଲା କେମିତି ?
ଖଡ଼ଗପୁର ଡିଆର୍ଏମ୍ ସୂଚନା ଦେଇ କହିଛନ୍ତି, ବାହାନଗା ନିକଟରେ ପ୍ରଥମେ ଲାଇନଚ୍ୟୁତ ହୋଇଥିଲା କରମଣ୍ଡଳ। କିଛି ସମୟ ପରେ ସେହିବାଟେ ଆସୁଥିବା ଏକ୍ସପ୍ରେସ ଧକ୍କା ହୋଇଥିଲା। ବେଙ୍ଗଲୁରୁ-ହାୱଡ଼ା ଏକ୍ସପ୍ରେସ କରମଣ୍ଡଳକୁ ଧକ୍କା ଦେଇଥିଲା।
ଉଭୟ ଏକ୍ସପ୍ରେସର ଅନେକ ବଗି ଓଲଟି ପଡ଼ିଛି। ଦୁର୍ଘଟଣାରେ ଅନେକ ଯାତ୍ରୀ ମୃତାହତ ହୋଇଛନ୍ତି। ଅନେକ ଯାତ୍ରୀ ଟ୍ରେନ୍ ତଳେ ଚପି ରହିଛନ୍ତି। ଉଦ୍ଧାର କାର୍ଯ୍ୟ ଜାରି ରହିଛି। ଆହତଙ୍କୁ ଉଦ୍ଧାର କରି ହସ୍ପିଟାଲରେ ଭର୍ତ୍ତି କରାଯାଇଥିବା ଜଣାପଡ଼ିଛି । ଘଟଣାସ୍ଥଳରେ ୫୦ଟି ଆମ୍ବୁଲାନ୍ସ ଥିଲେ ମଧ୍ୟ ଆହତଙ୍କ ସଂଖ୍ୟା ବେଶ୍ ଅଧିକ ଥିବାରୁ ବସ୍ ଯୋଗେ ଯାତ୍ରୀଙ୍କୁ ହସ୍ପିଟାଲ ସ୍ଥାନାନ୍ତର କରିବା ପାଇଁ ରାଜ୍ୟ ସରକାର ଯୋଜନା କରୁଥିବା ମୁଖ୍ୟ ସଚିବ ପ୍ରଦୀପ କୁମାର ଜେନା ସୂଚନା ଦେଇଛନ୍ତି।