Fri. Sep 20th, 2019

Odisha Link

bridging the missing links in odisha

କାରିଗର

  •  
  •  
  •  
  •  
  •  
  •  
  •  

ରତ୍ନମାଳା ସ୍ବାଇଁଙ୍କ କବିତା

କାରିଗର

ଏ କବିତାଟି ପେନ୍ ଇନ୍ ବୁକ୍ସ ପ୍ରକାଶନ ସଂସ୍ଥା ଦ୍ବାରା ପ୍ରକାଶିତ ରତ୍ନମାଳା ସ୍ବାଇଁଙ୍କ ସଂକଳନ ‘ଫଟୋଫ୍ରେମ’ରୁ ଅ‍ାସିଛି
ବହିଟି ଅ‍ାମାଜନରୁ ମଗାଇବା ପାଇଁ ଏଇଠି କ୍ଲିକ୍ କରନ୍ତୁ 〉


କେବଳ କାରିଗରଟିଏ ବୋଲି
ପରିଚୟ ପତ୍ର ଛାତିରେ ଝୁଲିଲା
ସାରା ସଂସାର ଗଢ଼ିଲି
ହେଲେ ନିଜକୁ କୋଉ ଗଢ଼ିହେଲା

ଗଢ଼ିବା ମୋର କାମ ହେ ସାଆନ୍ତେ!
ମୋତେ ମାଟି ଦିଅ ଗଢ଼ିବି
ଗୋବର ଦିଅ ଗଢ଼ିବି
ସୁନା ଦିଅ ଗଢ଼ିବି

ମୁଁ ତ ଗଢ଼ୁଛି ସାରା ପୃଥିବୀକୁ
ବାଲି ସିମେଣ୍ଟରେ
ଶବ୍ଦର ବୈଚିତ୍ର‍୍ୟକୁ ଦେଖ ହୋ!
କେତେବେଳେ ଇଟାବାଲିରେ
କବିତା ଗଢ଼ୁଛି ତ
କେତେବେଳେ ଶବ୍ଦରେ ଗଢ଼ୁଛି
କୋଡ଼ିଏ ମହଲା ଘର

ବନ୍ଧୁଏ କହନ୍ତି, ତମେ ଜଗତ ଗଢ଼ୁଛ
କିନ୍ତୁ ନିଜକୁ ଗଢ଼ିପାରୁନା
ହୁଏତ ଏମିତି ହୋଇଥାଇପାରେ
ମୁଁ ଯେମିତି ପୃଥିବୀ ଗଢ଼ୁଛି
ପୃଥିବୀ ବି ମୋତେ ସେମିତି
ଗଢ଼ୁଥାଇପାରେ ମୋ ଅଗୋଚରରେ।