Odisha Link
Bridging the Missing Links in Odisha

ପ୍ରସ୍ତୁତ ରୁହ ଗଣମାଧ୍ୟମ ତୁମ ଆବିଷ୍କାର ଉପରେ ପ୍ରଶ୍ନ ପଚାରିବା ଆରମ୍ଭ କରିବେ: ନାସା

By AKR

ନୂଆଦିଲ୍ଲୀ: ନା ନାସା , ନା ଇସ୍ରୋ କେହି ଖୋଜିପାରିଲେନି ଲ୍ୟାଣ୍ଡର ବିକ୍ରମର ଭଗ୍ନାବିଶେଷର ଠିକଣା। ହେଲେ ମିଶନ୍‌ ଚନ୍ଦ୍ରଯାନ-୨ ପୁଣି ଥରେ ଚର୍ଚ୍ଚାରେ। କାରଣ ଭାରତର ବହୁ ଚର୍ଚ୍ଚିତ ମିଶନ୍‌ ଚନ୍ଦ୍ରଯାନ-୨ର ଲ୍ୟାଣ୍ଡର ବିକ୍ରମ ସହ ଯୋଗାଯୋଗ ବିଚ୍ଛିନ୍ନ ହେବାର ବେଶ କିଛି ଦିନ ପରେ ଏହାର ଧ୍ୱଂସାବଶେଷର ଅବସ୍ଥିତି ନେଇ ଠୋସ୍‌ ପ୍ରମାଣ ମିଳିଛି। ଏହାରି ପଛରେ ଜଣେ ଭାରତୀୟଙ୍କ ଭୂମିକା ଅଛି।

ଏଥିରେ ଉଲ୍ଲେଖନୀୟ ଭୂମିକା ଗ୍ରହଣ କରିଥିବା ଭାରତୀୟ ଯୁବ ଇଞ୍ଜିନିୟର ଶାନ୍‌ମୁଗା ସୁବ୍ରମଣିଆନ୍‌ ଓରଫ ଶାନ୍‌ଙ୍କୁ ନାସା ଶ୍ରେୟ ଦେଇଛି। ନାସା ପକ୍ଷରୁ ଦିଆଯାଇଥିବା ସୂଚନା ଅନୁଯାୟୀ, ଲୁନାର ରେକନ୍ନାଇଜାନ୍ସ ଅର୍ବିଟର ପ୍ରକଳ୍ପର କ୍ୟାମେରା ଟିମ୍‌ ଚନ୍ଦ୍ରପୃଷ୍ଠର ବିଭିନ୍ନ ଫଟୋ ରିଲିଜ୍‌ କରିଥିଲେ। ଏହା ମହାକାଶରେ ରୁଚି ରଖୁଥିବା ଲୋକଙ୍କ ପାଇଁ ଛଡ଼ାଯାଇଥିଲା। ତେବେ ଏହି ଫଟୋସବୁ ଏବଂ ପୁରୁଣା ଫଟୋସବୁକୁ ଅନୁଶୀଳନ କରି ଶାନ୍‌ ଏଲ୍‌ଆରଓ ପ୍ରକଳ୍ପ ଟିମ୍‌କୁ ଧଳା ଚିହ୍ନିତ ସ୍ଥାନ ବାବଦରେ ସୂଚନା ଦେଇଥିଲେ। ଏହା ବିକ୍ରମ ଲ୍ୟାଣ୍ଡର ଚନ୍ଦ୍ରପୃଷ୍ଠ ଯିବା ପୂର୍ବରୁ ନଥିଲା। ନାସା ପକ୍ଷରୁ କୁହାଯାଇଛି ଏଲ୍‌ଆରଓକୁ ପ୍ରଥମେ ଶାନ୍‌ଙ୍କଠାରୁ ସକାରାତ୍ମକ ବାର୍ତ୍ତା ଆସିଥିଲା। ଏହାପରେ ଟିମ୍‌ ନିଜେ ଗବେଷଣା ଆରମ୍ଭ କରି ଏହା ହିଁ ବିକ୍ରମର ଅବତରଣସ୍ଥଳ ବୋଲି ନିଶ୍ଚିତ କରିଥିଲା।

ଶାନ୍‌ କୁହନ୍ତି:
ଏହି ବିଷୟରେ କହିବାକୁ ଯାଇ ଶାନ୍‌ କହିଛନ୍ତି ଯେ, “ମୁଁ ଅବତରଣସ୍ଥଳରୁ ପ୍ରଥମେ ୧ କିଲୋମିଟର ପରିଧି ମଧ୍ୟରେ ଏବଂ ପରେ ୨ ବର୍ଗ କିଲୋମିଟର ପରିଧି ମଧ୍ୟରେ ଖୋଜିବାକୁ ଆରମ୍ଭ କଲି। ମୁଁ ଉତ୍ତର ଦିଗରେ ଖୋଜିବାକୁ ଆରମ୍ଭ କଲି କାରଣ ବିକ୍ରମ ଉତ୍ତର ଦିଗରୁ ହିଁ ଅବତରଣ ସ୍ଥଳକୁ ଆଗେଇଥିଲା। ଏହାପରେ ମୁଁ ଗୁଡ଼ାଏ ଚିହ୍ନ ପାଇଥିଲେ ହେଁ ସେସବୁ ଭୁଲ ଥିଲା। ପରେ କିଛି ବିନ୍ଦୁ ଦେଖିବାକୁ ପାଇଥିଲି ଏବଂ ଗତ ୯ ବର୍ଷର ଚିତ୍ର ସହ ସେସବୁକୁ ମେଳାଇଥିଲି। ଯେତେବେଳେ ନିଶ୍ଚିତ ହେଲି, ତରୁନ୍ତ ନାସାକୁ ଜଣାଇଲି।”

ଶାନ୍‌ କହିଛନ୍ତି, ଅନ୍‌ଲାଇନ୍‌ରେ ଅନେକ ମହାକାଶ ଅନୁସନ୍ଧିତ୍ସୁ ଅଛନ୍ତି। ସେମାନଙ୍କୁ ଏକାଠି କରିବା ପାଇଁ ପ୍ରୟାସ ଦରକାର। ଛାତ୍ରମାନେ ଇସ୍ରୋ ଏବଂ ନାସା ପରି ସଂସ୍ଥାଙ୍କୁ ସାହାଯ୍ୟ କରି ଏଲ୍‌ଆରଓ ଇମେଜ୍‌ର ଡାଟାବେସ୍‌ ପ୍ରସ୍ତୁତ କରିବାକୁ ସେ ଆହ୍ୱାନ କରିଛନ୍ତି। ନାସା ପକ୍ଷରୁ ଶାନ୍‌ଙ୍କୁ ଏକ ମେଲ୍‌ ଯୋଗେ ଶ୍ରେୟ ଓ ଅଭିନନ୍ଦନ ଦିଆଯାଇଥିବାବେଳେ ଶେଷରେ ଲେଖାଯାଇଛି, ପ୍ରସ୍ତୁତ ରୁହ ଗଣମାଧ୍ୟମ ତୁମ ଆବିଷ୍କାର ଉପରେ ପ୍ରଶ୍ନ ପଚାରିବା ଆରମ୍ଭ କରିବେ।

Comments are closed.