ନୂଆଦିଲ୍ଲୀ: ଫେବୃଆରୀ ମାସ ଶେଷ ସପ୍ତାହରେ ଭାରତ ଆସିବେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ। ଡୋନାଲ୍ଡ ଟ୍ରମ୍ପଙ୍କ ଭାରତ ଗସ୍ତ କାର୍ଯ୍ୟକ୍ରମ ରିପୋର୍ଟ ଅନୁଯାୟୀ ଫେବୃଆରୀ ୨୪ରୁ ୨୬ ତାରିଖ ତିନି ଦିନ ପାଇଁ ଟ୍ରମ୍ପ ଭାରତ ଗସ୍ତରେ ଆସିବେ। ଟ୍ରମ୍ପଙ୍କ ଏହି ଗସ୍ତ କାଳରେ ଭାରତ-ଆମେରିକା ମଧ୍ୟରେ ୭୧,୨୦୦କୋଟି ଡଲାରର ବାଣିଜ୍ୟିକ ବୁଝାମଣା ସ୍ବାକ୍ଷର ହେବ। ଏହା ସହିତ ହଷ୍ଟନର ‘ହାୱଡି ମୋଦୀ’ ଭଳି ଗୁଜରାଟ ଅହମଦାବାଦର ମୋଟେରା ଷ୍ଟ୍ରାଡିୟମରେ ନରେନ୍ଦ୍ର ମୋଦୀଙ୍କ ସହିତ ଟ୍ରମ୍ପ ଏକ ସମାବେଶରେ ଉଦ୍ବୋଧନ ଦେବେ।
ଅନ୍ୟପଟେ କଶ୍ମୀର ପ୍ରସଙ୍ଗରେ ମଧ୍ୟସ୍ଥତା ପାଇଁ ଟ୍ରମ୍ପ ବାରମ୍ବାର ପ୍ରସ୍ତାବ ଦେଇ ଆସୁଥିବାବେଳେ ତାଙ୍କର ଏହି ଗସ୍ତ କାଳରେ ଏ ବାବଦରେ କିଛି ବି ଆଲୋଚନା ହେବ ନାହିଁ। ତେବେ ଟ୍ରମ୍ପଙ୍କ ଏହି ଗସ୍ତ ସମ୍ପର୍କରେ ସରକାରୀ ଭାବେ କିଛି ଘୋଷଣା କରାଯାଇ ନାହିଁ। ଆମେରିକା ସିନେଟ୍ରେ ଟ୍ରମ୍ପ ମହାଭିଯୋଗ ପ୍ରକ୍ରିୟାର ସମ୍ମୁଖୀନ ହେଉଥିବାବେଳେ ନଭେମ୍ବରରେ ରାଷ୍ଟ୍ରପତି ନିର୍ବାଚନ ହେବେ। ତେଣୁ ଏପରି ଗୁରୁତ୍ବପୂର୍ଣ୍ଣ ସମୟରେ ଟ୍ରମ୍ପଙ୍କ ଭାରତ ଗସ୍ତ ଗୁରୁତ୍ବପୂର୍ଣ୍ଣ ମନେ ହୁଏ। ୨୦୧୯ ସାଧାରଣତନ୍ତ୍ର ଦିବସ ପରେଡର ମୁଖ୍ୟ ଅତିଥି ଭାବେ ଟ୍ରମ୍ପଙ୍କୁ ଭାରତ ନିମନ୍ତ୍ରଣ କରିଥିଲା ହେଲେ ଏହାକୁ ସେ ପ୍ରତ୍ୟାଖ୍ୟାନ କରିଥିଲେ। ୨୦୧୫ରେ ଆମେରିକା ରାଷ୍ଟ୍ରପତି ଭାବେ ବରାକ ଓବାମା ଶେଷ ଭାରତ ଗସ୍ତ କରିଥିଲେ।
Comments are closed.