ଓଏଲ୍ ବ୍ୟୁରୋ: ମହାମାରୀ କରୋନା ଭାଇରସ୍କୁ ନେଇ ସାରା ବିଶ୍ବ ଚିନ୍ତାରେ। ଏପରିକି କରୋନାକୁ ନାଶ କରିବା ପାଇଁ ବହୁ ଦେଶ ଔଷଧ ତିଆରି କରିବାକୁ ଲାଗିଛନ୍ତି। ହେଲେ ଏହାରି ମଧ୍ୟରେ ଉତ୍ତର କୋରିଆ ଏକ ବିଶାଳ ଗୋଦାମ ନିର୍ମାଣ କରୁଛି। ଏହି ଗୋଦାମକୁ ପରମାଣୁ ଅସ୍ତ୍ରଶସ୍ତ୍ର ଗଚ୍ଛିତ ରଖିବା ଏବଂ ଏହାର ପରୀକ୍ଷା କରିବା ଦିଗରେ ବ୍ୟବହାର କରାଯିବ ବୋଲି କୁହାଯାଉଛି। ଗତ ମାର୍ଚ୍ଚ ମାସରେ ଉପଗ୍ରହରୁ ନିଆଯାଇଥିବା ଫଟୋ ଚିତ୍ରରୁ ଏହା ଜଣାପଡ଼ିଛି। ଚଳିତବର୍ଷ ଶେଷ ସୁଦ୍ଧା ଅଥବା ୨୦୨୧ ପ୍ରାରମ୍ଭରେ ଗୋଦାମ ନିର୍ମାଣ ଶେଷ ହୋଇଯିବ ନେଇ ମଧ୍ୟ ସୂଚନା ରହିଛି।
ଆମେରିକାର ସେଣ୍ଟର ଫର ଷ୍ଟ୍ରାଟେଜିକ ଆଣ୍ଡ ଇଣ୍ଟରନ୍ୟାଶନାଲ ଷ୍ଟଡିଜର ସାଟେଲାଇଟ୍ ଏହି ଫଟୋଚିତ୍ର ଉତ୍ତୋଳନ କରିଛି। ସେଣ୍ଟର ପକ୍ଷରୁ କୁହାଯାଇଛି ଯେ, ଉତ୍ତର କୋରିଆର ରାଜଧାନୀ ପ୍ୟୋଙ୍ଗୟାଙ୍ଗଠାରୁ ୧୭ ମାଇଲ ଦୂର ଉତ୍ତର ପଶ୍ଚିମରେ ଏହି ଗୋଦାମ ନିର୍ମାଣ ଚାଲିଛି। ଖୁବଶୀଘ୍ର ଏହାର ନିର୍ମାଣ ସମ୍ପୂର୍ଣ୍ଣ ହୋଇଯିବ ବୋଲି ଫଟୋରୁ ଦେଖିବାକୁ ମିଳୁଛି।
୨୦୧୬ରେ ଯେତେବେଳେ ଉତ୍ତର କୋରିଆ ଆମେରିକା ଉପରେ ଆକ୍ରମଣ କରିବା ଲାଗି କ୍ଷେପଣାସ୍ତ୍ର ନିର୍ମାଣରେ ଲାଗିଥିଲା ସେହି ସମୟରୁ ଏହି ଗୋଦାମ ନିର୍ମାଣ ଆରମ୍ଭ ହୋଇଛି। ପୂର୍ବରୁ ଏଠାରେ ସିଲ୍-ଲି ଗାଁ ରହିଥିଲା। ସେଣ୍ଟର ପକ୍ଷରୁ ଆହୁରି କୁହାଯାଇଛି ଯେ, କ୍ଷେପଣାସ୍ତ୍ର ଗଚ୍ଛିତ ରଖିବାରେ ଏହି ଗୋଦାମକୁ ବ୍ୟବହାର କରାଯିବ ବୋଲି ସମ୍ପୂର୍ଣ୍ଣ ଭାବେ ସ୍ପଷ୍ଟ ହୋଇଛି। ଏହା ଏତେ ବଡ଼ ଯେ ଏଠାରେ ହ୍ବାସୋଙ୍ଗ-୧୫ ଅନ୍ତର୍ଦେଶୀୟ ବାଲିଷ୍ଟିକ କ୍ଷେପଣାସ୍ତ୍ର ବି ରଖାଯାଇ ପାରିବ।
Comments are closed.