ଜଗତସିଂହପୁର: ପୁଲିସ ୪ ଶିକ୍ଷକ ଅପହର୍ତ୍ତାଙ୍କୁ ଧରିବାରେ ସଫଳ ହୋଇଛି। ମାଷ୍ଟରମାଇଣ୍ଡ ସହ ୩ ଅଭିଯୁକ୍ତ ଫେରାର ରହିଛନ୍ତି। ସେମାନଙ୍କୁ ଗିରଫ କରିବା ପାଇଁ ପୁଲିସ ବିଭିନ୍ନ ସ୍ଥାନରେ ଚଢ଼ଉ ଜାରି ରଖିଛି।
ଏପରି ଘଟଣା ଜଗତସିଂହପୁର ଜିଲ୍ଲାରେ ଘଟିଛି।ଡିସେମ୍ବର ୨ ତାରିଖ ରାତି ପ୍ରାୟ ୯ଟା ବେଳେ ତିର୍ତ୍ତୋଲ ଥାନା ଏରଡ଼ଙ୍ଗା ଗାଁର ଶିକ୍ଷକ ରବି ନାରାୟଣ ମିଶ୍ର ନାଲିବର ବଜ଼ାରରୁ ଘରକୁ ଫେରୁଥିଲେ। ଏହି ସମୟରେ ୬ରୁ ୭ ଜଣ ଯୁବକ ତାଙ୍କୁ ବନ୍ଧୁକ ଦେଖାଇ ଅପହରଣ କରି ନେଇଥିଲେ।
ପରେ ତାଙ୍କୁ ମୁଣ୍ଡ ଜାମିନ ରଖି ୧୦ ଲକ୍ଷ ଟଙ୍କା ଦାବି କରିଥିଲେ। ପରିବାର ଲୋକେ ୪ ଲକ୍ଷ ଟଙ୍କା ଦେବାପରେ ଶିକ୍ଷକ ଶ୍ରୀ ମିଶ୍ରଙ୍କୁ ଛାଡିଥିଲେ ଅପହରଣକାରୀ। ଦୁର୍ବୃତ୍ତଙ୍କ କବଳରୁ ମୁକୁଳିବା ପରେ ପରିବାର ଲୋକେ ଏନେଇ ତିର୍ତ୍ତୋଲ ଥାନାରେ ଅଭିଯୋଗ କରିଥିଲେ।
ପୁଲିସ ମାମଲା ରୁଜୁ କରି ବିଭିନ୍ନ ସ୍ଥାନରେ ଚଢ଼ଉ କରି ୪ ଅଭିଯୁକ୍ତଙ୍କୁ ଗିରଫ କରିଛି। ଏଥିସହ ଅଭିଯୁକ୍ତଙ୍କଠାରୁ ୫୦ ହଜ଼ାର ଟଙ୍କା ଏବଂ ଅପହରଣ ସମୟରେ ବ୍ୟବହାର ହୋଇଥିବା ଗାଡିକୁ ଜବତ କରିଛି।
ଗିରଫ ଅଭିଯୁକ୍ତମାନେ ହେଲେ ବିଶ୍ୱଜିତ ପାତ୍ର, ପ୍ରତାପ ମହାନ୍ତି, ସୂର୍ଯ୍ୟକାନ୍ତ ମହାନ୍ତି ଓ ତପନ କୁମାର ଦାସ। ତେବେ ମୁଖ୍ୟ ଅଭିଯୁକ୍ତ କୁହାଯାଉଥିବା ରାଜା ଓ ତାଙ୍କର ୩ ସହଯୋଗୀ ଏବେ ମଧ୍ୟ ଫେରାର ଅଛନ୍ତି। ପୁଲିସ ସେମାନଙ୍କୁ ଗିରଫ କରିବା ପାଇଁ ବିଭିନ୍ନ ସ୍ଥାନରେ ଚଢ଼ଉ ଜାରି ରଖିଛି।
Comments are closed.