ଭୁବନେଶ୍ବର: ଆସନ୍ତା ଅକ୍ଟୋବର ୨ରୁ ରାଜ୍ୟରେ ଆରମ୍ଭ ହେବ ମୋ ସରକାର ଯୋଜନା। ପ୍ରଥମ ପର୍ଯ୍ୟାୟରେ ଥାନା ଓ ସ୍ୱାସ୍ଥ୍ୟକେନ୍ଦ୍ରରୁ ସିଧାସଳଖ ଫିଡବ୍ୟାକ୍ ନେବେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। ତା’ ପୂର୍ବରୁ ଆଜି ଡିଜିପି ବିକେ ଶର୍ମା ଅଭିଯୋଗକାରୀଙ୍କ ସହ ସିଧାସଳଖ ଫୋନରେ କଥା ହୋଇଛନ୍ତି।
ଆପଣଙ୍କ ଏଫ୍ଆଇଆର୍କୁ ଥାନା ବାବୁ କେତେ ଗୁରୁତ୍ୱ ଦେଲେ? ,ଆପଣଙ୍କ ସହିତ ଥାନା ଅଧିକାରୀ କେଉଁ ଭାଷାରେ କଥା ହେଲେ?, ଖରାପ ଭାଷା କହିଲେ କି?, ପୋଲିସର ବ୍ୟବହାରରେ ଆପଣ ସନ୍ତୁଷ୍ଟ କି? ପୋଲିସକୁ ଆପଣ କେତେ ମାର୍କ ଦେବେ? ଏଭଳି ୮ଟି ପ୍ରସଙ୍ଗକୁ ନେଇ ଡିଜିପି ସିଧା ଅଭିଯୋଗକାରୀଙ୍କୁ ଫୋନକରି ତାଙ୍କ ଫିଡବ୍ୟାକ୍ ନେଇଛନ୍ତି। ଏହାପରେ ସେ ଅଭିଯୋଗକାରୀଙ୍କ ମାର୍କକୁ ଆଧାର କରି ସମ୍ପୃକ୍ତ ଥାନାର ରିପୋର୍ଟ କାର୍ଡ ତିଆର କରିବେ। ରିପୋର୍ଟ କାର୍ଡ ଭଲ ନଆସିଲେ ସମ୍ପୃକ୍ତ ଥାନା ଅଧିକାରୀ ଓ କର୍ମଚାରୀଙ୍କ ଆଚରଣ ପରିବର୍ତ୍ତନ ପାଇଁ କୁହାଯିବ।
ଏପରି କି ଆବଶ୍ୟକ ପଡ଼ିଲେ ଥାନା ଅଧିକାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯିବ ବୋଲି ଡିଜିପି ବିକେ ଶର୍ମା କହିଛନ୍ତି। ଏହି ରିପୋର୍ଟ କାର୍ଡକୁ ଆଧାର କରି ଦଣ୍ଡ ଓ ପୁରସ୍କାର ମଧ୍ୟ ପ୍ରଦାନ କରାଯିବ। ରାଜ୍ୟ କ୍ରାଇମ ରେକର୍ଡ ବ୍ୟୁରୋରୁ ପରିଚାଳିତ ରାଜ୍ୟସ୍ତରୀୟ କଲ ସେଣ୍ଟରରୁ ଡିଜିପି ଏହି ଫିଡବ୍ୟାକ୍ ନେଇଛନ୍ତି।
Comments are closed.