ହ୍ବାଇଟ୍ ଆଇଲାଣ୍ଡରେ ଆଗ୍ନେୟଗିରି ଉଦ୍ଗୀରଣ

ନୂଆଦିଲ୍ଲୀ: ନ୍ୟୁଜିଲାଣ୍ଡର ସମ୍ବଦେନଶୀଳ ଦ୍ବୀପ ହ୍ବାଇଟ୍ ଆଇଲାଣ୍ଡ୍‌ରେ ଆଜି ହଠାତ୍ ଆଗ୍ନେୟଗିରି ଉଦ୍‌ଗୀରଣ ହୋଇଛି। ଏହା ଦ୍ବାରା ୫ ଜଣ ବ୍ୟକ୍ତିଙ୍କ ମୃତ୍ୟୁ ହୋଇଥିବା ସ୍ଥାନୀୟ ପୁଲିସ ଦ୍ବାରା ସ୍ପଷ୍ଟ କରିଛି। ଏହି ଆଗ୍ନେୟଗିରି ଉଦ୍‌ଗୀରଣରେ ବହୁ ଲୋକ ଆହତ ହୋଇଥିବା ବେଳେ ପ୍ରାୟ ଶହେରୁ ଅଧିକ ଘଟଣାସ୍ଥଳରେ ଫସି ରହିଥିବା ଆଶଙ୍କା କରାଯାଉଛି। ଯେଉଁ ସ୍ଥାନରେ ଆଗ୍ନେୟଗିରି ଉଦ୍‌ଗୀରଣ ହୋଇଛି ସେଠାରେ କିଛି ସମୟ ପୂର୍ବରୁ ପର୍ଯ୍ୟଟକମାନେ ଚଳପ୍ରଚଳ କରୁଥିବା ଦେଖିବାକୁ ମିଳିଥିଲା।

ସ୍ଥାନୀୟ ଜଣେ ପୁଲିସ ଅଧିକାରୀ ସୂଚନା ଦେଇ କହିଛନ୍ତି ଯେ, ଆଗ୍ନେୟଗିରି ଉଦ୍‌ଗୀରଣ ସ୍ଥଳରେ ଅନେକ ଲୋକ ଫସି ରହିଛନ୍ତି। ତେବେ କେତେ ଲୋକ ଫସି ରହିଛନ୍ତି ତାହାର ସଠିକ୍ ସଂଖ୍ୟା ଜଣାପଡିନାହିଁ। ଆଗ୍ନେୟଗିରି ଉଦ୍‌ଗୀରଣରେ ଫସି ରହିଥିବା ଅଧିକାଂଶ ଲୋକ ହେଉଛନ୍ତି ବିଦେଶୀ। ବର୍ତ୍ତମାନ ସେଠାକୁ ପୁଲିସ ଓ ଉଦ୍ଧାରକାରୀ ଦଳ ଯିବା ବିପଦଜନକ ରହିଛି ବୋଲି ସେଠିକାର ପ୍ରଧାନମନ୍ତ୍ରୀ ଜେସିନ୍ଦା ଆର୍ଡର୍ନ କହିଛନ୍ତି।