ପୁରୀ: କୋଭିଡ କଟକଣା ମଧ୍ୟରେ ସୁରୁଖୁରରେ ଅନୁଷ୍ଠିତ ହେଲା ବିଶ୍ବ ପ୍ରସିଦ୍ଧ ରଥଯାତ୍ରା। ଯାହା ସାରା ବିଶ୍ବ ପାଇଁ ଏକ ଉଦାହରଣ ପାଲଟିଛି। ଏସବୁ ମଧ୍ୟରେ ଶେଷ ହେଲା ମହାପ୍ରଭୁଙ୍କ ଘୋଷ ଯାତ୍ରା। ଅପରପକ୍ଷେ ଶ୍ରୀମନ୍ଦିର ରତ୍ନସିଂହାସନରୁ ଗୋଟିଏ ପଦ୍ମପାଖୁଡା ପଥର ଗାଏବ ହୋଇଥିବା ଅଭିଯୋଗ ହୋଇଛି। ପଥର କଢାଯାଇ ସେଠାରେ ସିମେଣ୍ଟ ଏବଂ ବାଲି ପଲସ୍ତରା କରାଯାଇଥିବା ଅଭିଯୋଗ ହୋଇଛି।
ଶ୍ରୀଜିଉଙ୍କ ରଥଯାତ୍ରା ସମୟରେ ରତ୍ନସିଂହାସନରୁ ପଥର କଢା ଯାଇଥିବା ପ୍ରତିହାରୀ ସେବକ ଈପ୍ସିତ ପ୍ରତିହାରୀ ମଙ୍ଗଳବାର ଅଭିଯୋଗ କରିଛନ୍ତି। ରାଜ୍ୟ ସରକାର ଏହାର ଯଥାଶୀଘ୍ର ତଦନ୍ତ କରିବାକୁ ସେ ଦାବି କରିଛନ୍ତି। ଶ୍ରୀଜଗନ୍ନାଥ ଏବଂ ସୁଦର୍ଶନଙ୍କ ସମ୍ମୁଖରେ ରହିଥିବା ଗୋଟିଏ ପଥର କଢା ଯାଇଥିବା ସେ ଗଣମାଧ୍ୟମକୁ କହିଛନ୍ତି।
ରତ୍ନସିଂହାସନର ଆଉ ଦୁଇଟି ସ୍ଥାନରେ ଖାଲ ହୋଇଥିବାରୁ ସେଠାରୁ ପଥର କଢା ଯାଇଥିବା ସେ ଆଶଙ୍କା କରିଛନ୍ତି। ଚତୁର୍ଦ୍ଧାମୂର୍ତ୍ତି ନବଦିନବ୍ୟାପୀ ଘୋଷଯାତ୍ରାରେ ଶ୍ରୀମନ୍ଦିରରୁ ବାହାରି ଶ୍ରୀଗୁଣ୍ଡିଚା ମନ୍ଦିରକୁ ଯାଇଥିଲେ। ଭାରତୀୟ ପ୍ରତ୍ନତତ୍ତ୍ବ ସର୍ବେକ୍ଷଣ ସଂସ୍ଥା ପକ୍ଷରୁ ଗର୍ଭଗୃହ ସ୍ଥିତି ଯାଞ୍ଚ କରାଯାଇଥିଲା। ସେହି ସମୟରେ ରତ୍ନସିଂହାସନରୁ ପଦ୍ମପାଖୁଡା ପଥର ବାହାର କରାଯାଇଥିବା ଶ୍ରୀ ପ୍ରତିହାରୀ ଅଭିଯୋଗ କରିଛନ୍ତି।
Comments are closed.