ନୂଆଦିଲ୍ଲୀ: ମହାମାରୀ କରୋନାକୁ ନେଇ ସାରା ବିଶ୍ବ ଚିନ୍ତିତ। ହେଲେ ଏହାରି ମଧ୍ୟରେ ଯୋଗ ଗୁରୁ ରାମଦେବ ବାବା ଆର୍ୟୁବେଦିକ ଔଷଧ ଦ୍ବାରା କରୋନାର ସଫଳ ଚିକିତ୍ସା ହେଉଥିବା ନେଇ ଦାବି ରଖିଛନ୍ତି। ଏଥିସହିତ କରୋନିଲ ନାମକ ଏକ ଟାବଲେଟ ଲଞ୍ଚ କରିଛି ପତଞ୍ଜଳୀ। ଏକ ଡବାରେ ବଟିକା ରୂପରେ ଏହି ଔଷଧ ବଜାରରେ ଉପଲବ୍ଧ ହେବ। ଔଷଧ ସେବନର ୫ରୁ ୧୪ ଦିନ ମଧ୍ୟରେ ରୋଗୀ ୧୦୦ ପ୍ରତିଶତ ଆରୋଗ୍ୟ ଲାଭ କରିବେ ବୋଲି ବାବା ରାମଦେବ ହରିଦ୍ବାରରେ ଔଷଧ ଲଞ୍ଚ କରିବା ଅବସରରେ କହିଛନ୍ତି।
ଔଷଧ ଲଞ୍ଚ କରିବା ଅବସରରେ ବାବା ରାମଦେବ ଏବଂ ପତଞ୍ଜଳିର ସିଇଓ ବାଲକ୍ରିଷ୍ଣ ଏହି ଔଷଧର କ୍ଲିନିକାଲ ଟ୍ରାଏଲର ଫଳାଫଳ ବିଷୟରେ କହିଥିଲେ। ପତଞ୍ଜଳି ରିସର୍ଚ୍ଚ ଇନଷ୍ଟିଚ୍ୟୁଟ ଏବଂ ଜୟପୁରସ୍ଥିତ ନ୍ୟାଶନାଲ ଇନଷ୍ଟିଚ୍ୟୁଟ ଅଫ ମେଡିକାଲ ସାଇନ୍ସ ମିଳିତ ଭାବେ ଏହାର ପ୍ରସ୍ତୁତ କରିଛନ୍ତି। ହରିଦ୍ବାରସ୍ଥିତ ଦିବ୍ୟ ଫାର୍ମାସୀ ଏବଂ ପତଞ୍ଜଳି ଆୟୁର୍ବେଦ ଲିମିଟେଡ ଏହାର ଉତ୍ପାଦନ କରୁଛନ୍ତି।
ବାବା ରାମଦେବ କହିଛନ୍ତି, ପୂରା ଦେଶକୁ କରୋନା ଭୂତାଣୁ ଚିକିତ୍ସା ପାଇଁ ଔଷଧର ପ୍ରତୀକ୍ଷା ଥିଲା। ଏଥିପାଇଁ ଆମେ ଔଷଧ ପ୍ରସ୍ତୁତ କରିସାରିଛୁ। ୨୮୦ ଜଣ ରୋଗୀଙ୍କ ଉପରେ ଏହି ଔଷଧର ପରୀକ୍ଷଣ କରାଯାଇଥିଲା ଏବଂ ସମସ୍ତ ରୋଗୀ ସୁସ୍ଥ ହୋଇଥିଲେ। ଔଷଧ ସେବନ ପରେ କୌଣସି ରୋଗୀଙ୍କଠାରେ କିଛି ବି ସମସ୍ୟା ଦେଖିବାକୁ ମିଳି ନାହିଁ କି କାହାର ମୃତ୍ୟୁ ଘଟି ନାହିଁ। ଔଷଧ ସେବନ କରିବାର ୩ ଦିନ ପରେ ୬୯ ପ୍ରତିଶତ ରୋଗୀ ସୁସ୍ଥ ହୋଇଥିଲେ। ୭ ଦିନ ପରେ ୧୦୦ ପ୍ରତିଶତ ରୋଗୀ ଆରୋଗ୍ୟ ଲାଭ କରିଥିଲେ। ଏହା ଆମ ପାଇଁ ଏକ ଐତିହାସିକ ମୁହୂର୍ତ୍ତ ବୋଲି ବାବା ରାମଦେବ କହିଥିଲେ।
ରାମଦେବ କହିଛନ୍ତି ଯେ, ଏହି ଔଷଧ ବ୍ୟବହାର ଦ୍ୱାରା ଶତ ପ୍ରତିଶତ ସୁସ୍ଥ ହାର ଓ ଶୂନ୍ୟ ପ୍ରତିଶତ ମୃତ୍ୟୁ ହାର ଦାବି କରିଛନ୍ତି ରାମଦେବ। ଏବେ କରୋନିଲକୁ ନେଇ ଅନେକ ପ୍ରଶ୍ନ ଉଠିବ, ହେଲେ ସେସବୁର ଜବାବ ଦେବାକୁ ମୁଁ ପ୍ରସ୍ତୁତ ବୋଲି ସେ କହିଛନ୍ତି।
Comments are closed.